Segun Parlamentario Endy Croes (MEP): ‘Te aworaki nos no lo acepta un presupuesto complementario’

Den un sala di parlamento renoba, specialmente cu ekiponan audiovisual y aparato electronico moderno, parlamento di Aruba lo tene su prome reunion publico otro siman, despues di un temporada di reces.

Den e reunion aki lo trata con presupuesto ta bayendo, cumpliendo cu un mocion cu parlamento aki a bin cune for di cu e gabinete actual a sinta. Ta asina cu cada meymey di aña, na luna di augustus, parlamento kier tin un reportahe di e cifranan di e prome 6 lunanan te 30 di juni, pa nan por haci e trabou di controla con entrada y gasto di gobierno ta bayendo di acuerdo cu e presupuesto aproba pa 2019.

Parlamentario Endy Croes (MEP) a bisa categoricamente cu nan kier evita cu na final di aña, gobierno bin bati na porta di parlamento pa busca aprobacion di mas placa pa medio di un presupuesto complementario, manera a yega di sosode den gobierno anterior. Pero pa mantene e control cu pueblo ta desea, nan ta hacie ariba nan propio gobernantenan. Tur e control aki –segun e parlamentario– ta pa evita cu na final di aña gobierno bin cu un presupuesto complementario pa bin pidi mas placa, cu ya caba no tin. “Te aworaki nos no lo acepta un presupuesto complementario,” el a bisa categoricamente.

E ta haya cu e echo aki a haci cu e debe nacional a crece di e actual magnitud. Croes a manda un mensahe pa su propio gobierno di coalicion (MEP-POR-RED), ya cu nan ta ansioso pa mira un presupuesto cu ta bayendo balansa. Pronto nan lo por tin un bista real con e presupuesto 2019, cu a wordo aproba alrededor di 1.4 biyon florin, ta bayendo. Ya cu si nos ta meymey di aña, e entradanan mester por alcansa alrededor di 700 biyon florin pa ‘nos ta riba e bon track’.

Y riba e gasto tambe nan mester tin mita gasta di loke a wordo premira. Esaki tambe ta conta pa e gastonan, entre nan di personal, cu ta esun cu tin mas peso riba nos presupuesto nacional, hunto cu e pago di interes riba debe nacional. E dos componente aki so ta uza alrededor di 50% di e presupuesto total di pais Aruba. E aña aki so, pais Aruba ta paga 232 miyon florin na interes di placa fia, cu ta nifica 18% di e presupuesto total. Mientras cu e gasto di personal di gobierno ta alrededor di 36% di e presupuesto.

Den caso cu mester coregi, nan tin seis luna ainda pa coregi, y percura cu e presupuesto aproba lo cuadra na final. Kiermen cu gobierno mester keda den e margen di locual a keda presupuesta. “Ohala cu nada fuera di contexto of grandi separa di locual nos por a premira lo pasa,” Croes a bisa. Ehecutando e mocion aki, nan a yega di controla gobierno aña pasa y nan a logra di cera cu un presupuesto neutral, el a bisa.