Segun Parlamentario Endy Croes: Concepto PPP no ta malo, pero depende di prioridad

Parlamentario Endy Croes a referi na un encuentro y presentacion oficial cu nan tabatin cu Contraloria General, unda nan a haya un bista mas amplio riba e concepto PPP (Private Public Partnership).

E mes ta haya cu e concepto aki por wordo considera. “Si bo por carg’e, pag’e y bo por trah’e diligentemente, cumpliendo cu tur standard, mi ta di acuerdo,” el a declara na Bon Dia Aruba. Pero e ta haya cu na e momento aki e ta hopi dificil.

E parlamentario su opinion ta cu si gobierno no tin un manera -manera e situacion tabata- por haci uzo di otro modelo pa construi algo pa bo pais. Sinembargo no mester perde for di bista e prioridadnan. E ta haya cu un prioridad den tapara ta un prizon pa nos pais. KIA ta den un situacion deteriora y gobierno ta explorando posibilidad pa atende cu e situacion aki.

“Si ta caminda cu bo pais no ta bay core un riesgo y bo no tin e placa e momento ey pa trah’e, mi ta opina ban uza e sistema aki,” el a bisa na Bon Dia Aruba.

Sinembargo si nan ta bay traha e proyectonan PPP, manera a wordo haci durante e gobierno anterior, sin bisa niun hende con ta bay paga nan, e ta un manera cu nan kier evita. Ya cu esaki a haci cu gobierno mester bin cu un crisis heffing di 1.5% pa cumpli entre otro cu e pago di PPP, el a bisa.

Croes a declara cu durante e presentacion, Contraloria General a entrega y a duna un splicacion cu tin un rapport di National Audit Office di Reino Uni cu tin tur experticio riba tur sorto di PPP den diferente pais. Den e rapport ta señala cu nan no ta mira e balor agrega entre e PPA actual y e sistema tradicional. Kiermen entre si gobierno mes ta trah’e pa medio di e procedura normal, of si un hende of compania di afo ta haci e diseño di financiamento, preparacion, presentacion y mantencion di e proyecto.

E parlamentario a bisa cu un pregunta cu el a haci y cu no ta aparece riba e rapport aki ta, kico ta e interes cu pais Aruba ta bay paga den e 20 aña riba e diferente proyecto PPP realisa durante gobernacion anterior, specialmente riba Green Corridor y Watty Vos Boulevard. Aunke el a cualifica e presentacion aki como uno hopi profesional, e no a haya contesta riba su pregunta.

“Esey no tabata hopi cla den e rapport aki,” el a bisa. Segun e parlamentario, nan a pidi e institucion aki pa haci un extra ehercicio pa haci e comparacion entre si gobierno mes ta pidi credito pa financia cierto proyecto of recuri na e formula di PPP.