Parlamentario di oposicion, Jennifer Arends-Reyes a tuma nota di e anuncio cu Minister di Enseñansa, Rudy Lampe a haci riba reduccion te cu 0% riba e credito di estudio otorga pa Arubalening.
E decision aki riba su mes, e ta hay’e bon. Sinembargo e ta cuestiona e hecho cu e mandatario ta neglisha e situacion di e maestronan cu ta bin vociferando nan preocupacion y te hasta a bin cu varios marcha, y nan no a wordo atendi debidamente.
“Locual bo tin cu wak ta pa bo mantene tambe locual ta e calidad di bo enseñansa na Aruba. Prome cu bo ta bay step mas dilanti pa locual ta e otro cosnan cu bo kier drecha tambe,” segun e parlamentario aki.
Segun Arends-Reyes den e gobierno anterior nan tambe tabatin e facilidad di estudio aki na un porcentahe hopi abou, di 3%. Naturalmente di 3% pa cero (0%) porciento, e ta ‘bonbini’. Sinembargo mester wak e decision aki den su totalidad tambe pa e grupo cu ta bay beneficia di dje.
E ta haya cu locual ta e cumplimento di studielening, ora cu nan ta bin bek, ta e punto cu nan ta confronta dificultad pa atende cune. Pero tambe di e cantidad di studiantenan cu kier haci uzo di e credito aki.
“Nos den pasado tabatin otro diferente incentivo na momento cu nan kier pag’e,” el a bisa. Te hasta nan tabata haya un 50% di descuento cu tabata motiva e persona pa bay banco y haci un fiansa, ya cu nan tabata haya un porcentahe basta considerabel di rebaho di nan debe original.
Ademas ya caba por deduci fiscalmente te cu 10 mil florin pa aña, y esaki ta hopi mas bentahoso cu e porcentahe, segun e parlamentario aki. E ta recorda cu e reduccion fiscal aki a pasa durante e gobierno anterior pa deduci fiscalmente DUO di Hulanda y studielening.
E parlamentario a indica cu mester corda bon cu e prestamo mas grandi ta esun di Hulanda, mientras cu esun di Arubalening ta un parti chikito di locual e studiantenan ta haci uzo di dje. “Pero den todo caso, tin ainda mi ta kere diferente opcion,” el a bisa.
