Segun parlamentario Benny Sevinger: Gobierno ta sigui hinca placa den Serlimar sin un splicacion cla

Parlamentario Benny Senvinger kende a bira un critico fuerte contra e ley di Serlimar cu pronto lo trata den parlamento, a declara cu e proyecto di ley aki no tin niun beneficio ni pa pueblo di Aruba ni pa e proceso di pikimento of maneho di sushi.

“Simplemente ta e minister cu tin un man hinca den e compania ta bay gana e destaho aki,” el a bisa.

Segun e parlamentario aki, niun di e companianan cu a participa den e destaho a entrega prijs. Mientras cu e mandatario ta bin cu un cambio di ley pa haya 20 miyon extra, sin duna un splicacion cla kico e lo bay haci cu e suma aki.

E ta puntra su mes si e placa aki ta bay pa e compania nobo of pa e proyecto yama Solid Waste Treatment Facility (SWTF). E ta aclaria a base di e concepto di ley cu a yega na Parlamento cu no ta Serlimar ta bay traha riba solid waste, sino un compania nobo cual lo haya un tereno di 20 mil meter cuadra, cual lo keda pabou di WEB.

Segun Sevinger, e compania nobo aki cu supuestamente mester bira un solucion pa atende cu e problematica di sushi, lo abstene di realisa cierto tarea of trabou importante. Pues nan no mester atende cu e problema di tur e sushedad di nos pais. “Kico anto e compania nobo aki tin cu haci?,” parlamentario Sevinger a puntra su mes.

E ta un di e preguntanan cu parlamentario Sevinger ta sigur cu no lo bay haya contesta riba dje. Ayera tabata e delaster dia pa e parlamentarionan di e diferente fraccionnan tabatin pa manda nan preguntanan pa gobierno riba e ley di Serlimar. Prome cu e ley controversial aki lo wordo trata, parlamento mester warda e contesta di gobierno.

Pa e parlamentario di oposicion y ex minister di infrastructura durante e gobierno anterior Mike Eman I y II, tin duda tambe cu si un compania nobo ta bay inverti un suma substancial di 350 miyon florin den resolve un problema di sushedad, sin cu nan ta haya nan placa bek. Unda e ta bay cera un contract cu Serlimar, unda e compania estatal aki no por cubri ni su costo di operacion. Con Serlimar ta bay paga e compania aki? E ta haya cu esaki tabata un motibo pakico niun compania a bay bid.

Den su edicion di Ayera Bon Dia Aruba a publica parti di e copia di e declaracion di e accountant contrata, den e caso aki PriceWaterhouse riba e situacion financiero precario cu e compania ta confronta prome y despues cu el a bira un empresa Sui Generis (SG).

Finalmente parlamentario Sevinger a declara cu durante e tratamento di e ley aki, tur miembro di nos organo legislativo lo tin e decision final y crucial, si nan ta bay aproba e ley aki si of no. Ya cu nan tambe como pueblo lo bay sufri e efectonan cu e aprobacion di un ley di e indole aki tin.