E momento a yega pa Minister di Husticia Andin, acepta y ehecuta e bon conseho cu tres aña atras Parlamentario Bikker a sugeri na Minister Dowers, pa e tuma su retiro mirando cu e ta cumpliendo cu net nada di su promesa haci na pueblo.
Parlamentario Arthur Dowers a mustra cu comunidad completo ta pasando den momentonan dificil, no solamente pa e presion financiero cu gabinete Wever Croes a implementa riba pueblo, pero pa un insiguridad total rond di e isla cu tantisimo caso di atraco y ladronicia.
“Ya mi a yega di bisa esaki caba, Aruba no tin un Minister di Husticia pero un Minister di Inhusticia caminda Andin Bikker solamente a logra di cumpli cu su soño di un dia bira Minister di Husticia pero en realidad mirando loke ta tumando luga rond di nos isla, simplemente e no ta cumpliendo cu su obligacionnan.
Den pasado na tur momento cu un atraco sosode, el a bay prensa y hasta den Parlamento pidi mi persona pa entrega mi retiro pero ta expresionnan cu el a lubida cu el a haci ya cu loke ta pasando na e momentonan aki, ta simplemente tristo.
Ciudadanonan cu practicamente no por Sali un rato di nan cas, ya cu nan por wordo atraca riba caminda publico of ora cu nan yega nan cas, nan ta ripara cu ladronnan a drenta den nan cas y bay cu cosnan valioso.
Loke ta mas remarcabel ta e hecho cu diripiente Minister Bikker ta bin dilanti y bisa cu siguridad di nos pueblo mester ta un responsabilidad comparti, caminda no solamente comercial pero pueblo den su totalidad mester tin participacion den e proceso pa mantene ordo y siguridad riba nos isla.
E mesun Minister Bikker aki cu den pasado continuamente tabata grita pa retiro di mi persona como Minister di Husticia, asina cu un caso di atraco wordo registra, awor ta pretende cu maneho di husticia riba nos isla, no ta su responsabilidad pero di tur hende.
Increibel e forma con Bikker ta trata di core pa su responsabilidadnan como Minister pero ta su persona a sigura pueblo cu ora cu e bira Minister di Husticia, e lo elimina crimen ya cu e tin un plan caba con pa haci esaki.
El a priminti camaranan di siguridad na tur cas rond Aruba, a priminti di lo actua preventivamente pero loke pueblo por mira awor ta cu Minister Bikker nunca a cumpli cu su promesanan mescos cu su gobierno y awor ta tira tur culpa riba comercio y pueblo y Minister anterior.
E momento a yega for di basta tempo caba pa Minister Bikker asumi su responsabilidad, brinda pueblo e solucionnan contra actonan criminal cu el a priminti cu e tabatin tempo cu e tabata den oposicion y elimina crimen manera cu el a sigura pueblo cu e lo haci.
Pueblo ta spera mas di su persona como titula di husticia, sikiera un plan realistico cu ta sigura pueblo cu nan por biba den tur trankilidad y mas tanto stop di busca hende pa culpa. Mi ta contento cu porfin Bikker a realisa cu mantene siguridad ta un asunto serio y complica.
Te cu awor e tin un proyecto di helicopter cu lo mester a haci un cantidad di cos na siguransa di comunidad pero te cu awor ta placa di pueblo e ta gasta pa cubri gastonan di un helicopter cu no ta eficiente den henter e proceso aki.
Ya caba cuerpo policial a bin ta haciendo un tremendo trabou den henter e lucha contra criminalidad, actuando rapidamente sin un aporte esencial cu mester bin for di e plan di Minister Bikker cu nunca el a presenta.
Awor ta papia di drones, ta papia di otro posibilidadnan cu simplemente Bikker mes ta bon na altura cu e no por cumpli cu esakinan pero mientras tanto e ola di criminalidad ta sigui aumenta y ta sigui cu curso sin un aporte di su partido na e lucha aki,” Parlamentario Arthur Dowers a declara.
