Ayera ex minister di Husticia y Parlamentario di oposicion, Arthur Dowers (AVP) a referi na e investigacion Flamingo, caminda ex-minister Otmar Oduber ta wordo sospecha di corupcion y otro hecho castigabel relaciona cu otorgamento di tereno di gobierno.
E parlamentario a declara na Bon Dia Aruba cu semper cu un caso di e caliber aki ta pasa, ta algo di lamenta. Pasobra e ta un acontecimento cu ta afecta e credibilidad di politica y institucion di gobernacion.
Pero e ta haya cu locual a sosode tabata wordo spera. Aunke den pasado Otmar Oduber a yega di forma parti di su partido, pero nan constata cu ex politico ta ocupa su mes ‘cu hopi cos cu no ta cuadra’, y e no a sigui den nan partido, el a declara na e matutino aki.
Den e caso, Dowers ta kere cu mester laga cu husticia cana su caminda. Mesun cos nan a haci den pasado, y e biaha aki nan ta bolbe hacie. Pero si nan ta lamenta algun acontecimento rond di e situacion cu a surgi cu e investigacion Flamingo.
E ta haya hopi straño cu den e situacion cu a surgi cu e caso Flamingo, nos prome minister a manda un declaracion bisando cu mester laga husticia cana su caminda. Dowers a referi cu e mesun mandatario aki a yega ataca ex-minister Paul Croes tempo cu a forma parti di e gobierno anterior. Hasta pidi pa corta tur entrada di Paul Croes for di fondo publico pasobra el a bira un sospechoso.
Pero e no por a atende cu e prome mandatario por a bisa mesun cos relaciona cu e caso di Otmar Oduber. Mientras cu Dowers ta haya cu e prome mandatario tabata parti di dje. E mester tabata sa – segun parlamentario Dowers – ya cu e mes a yega di bay OM pa denuncia e mesun persona cu den pasado el a yama corupto, y cu despues a forma parti di su gobierno.
E parlamentario a prefera di no bay riba investigacion. Pero si e ta haya cu nan a yuda acumula informacion cu e ta considera falso pa acusa ministernan di gobierno anterior. E ta referi no solo na ex-minister Paul Croes, pero tambe e investigacion relaciona cu ex-minister Sevinger acusa di a otorga tereno, y e persona cu a hay’e a bay bende despues. E ta haya cu e ora ey e minister en cuestion si ta corupto. Pero awor cu a bin un investigacion caminda Ministerio Publico (OM) ta bati na nan porta mes pa e mesun acusacion, awor tur hende ta inocente.
