Segun papel Kadaster tereno a keda otorga na saliña Malmok

Manera nos a publica ayera, Departamento di Infrastructura y Planificacion ta keda insisti cu no tin ningun tereno otorga na area di saliña Malmok. E saliña ta un di e 16 areanan di naturalesa gobierno a priminti cu lo wordo proteha. Sinembargo, nos a haya prueba for di nos fuentenan di un di e shete parcelanan den e area cu toch a wordo otorga.

Manera nos a publica ayera tambe ta cu Aruba Birdlife Conservation (ABC) a emiti un comunicado caminda a señala cu nan a haya prueba cu tur shete parcela na saliña di Malmok tin doño caba. Den e registro publico na Kadaster, un di e parcelanan aki berdad por mira cu e ta registra y marca, pero no tin nomber riba dje. For di nos fuentenan nos a logra tira un bista riba un ‘reserveringsbrief’ Malmok 2a 13 23. E documento ta mustra cu directiva a firma esaki dia 25 di april, anto e akte a wordo aproba riba 16 di mei 2017. E tereno, 1 parcela den e caso aki, ta uno di 1042 metro cuadra. Nos a bolbe acerca DIP cu e pregunta. “Asina leu cu mi sa, no a tuma luga niun otorgamento na Malmok recientemente”, miembro di management team di DIP Isabel Dammers ta bolbe contesta Bon Dia Aruba.

No ta prome biaha
Nos a yega di publica caba cu gobierno kier otorga shete tereno den e saliña sinembargo e area aki ta cay den zona berde segun ROP. Algun tempo pasa nos a informa caba cu hurista di DIP a conseha negativo riba esaki, sinembargo el a haya ordo di conseheronan di Ministerio di Infrastructura pa sigui cu e proceso. E splicacion di banda di e ministerio aki tabata cu nan tabata midi e area di nobo y lo otorga tereno cu ta riba e frontera di e zona berde, cu si por, segun nan.

Manera nos a yega di informa tambe ta cu e plan di ordenacion (ROP) ta 10 aña caba despues di e ley cu ta regla esaki LRO a pasa. Sinembargo ta 10 aña tambe cu gobiernonan (di MEP y AVP) no a sigui cu e parti di implementacion, esta e plan di reglamentacion (ROPV). E falta di e reglanan aki gobiernonan a uza frecuentemente pa desvia di e ROP pa duna tereno den area di naturalesa protegi pa construccion. Minister di Infrastructura Benny Sevinger tambe a bisa cu e ROP ta uno bieu y no por dicta un maneho bou di gobierno actual. Pa motibo di esey e ta den proceso di cambia e ROP tambe.

Den un entrevista cu sra. Dammers di DIP, el a expresa cu e departamento DIP si ta mantene su mes na e ROP pa cu peticionnan nobo pa terenonan comercial. El a bisa esaki aña pasa durante e polemica di cobamento rond di Seroe Crystal. Pero despues nos por a constata cu minister di Infrastructura a sigui otorga tereno pa construccion, manera esun na Bubali Plas.

Bon Dia Aruba tambe ta constata cu no tin un maneho fiho pa otorga tereno publico. E procedura normal ta cu hende ta haci un peticion na DIP unda mester cumpli cu cierto rekisitonan manera muestra cu tin suficiente placa pa por construi un cas of negoshi. E consehonan di DIP (y otro departamentonan den gobierno, manera DOW) e ora ta bay pa minister di Infrastructura cu ta esun cu ta aproba e peticion. Pero manera nos por mira a base di e documentonan cu ta lek den prensa, tin un caminda mas cortico unda personanan ta entrega nan peticion directo pa minister cu ta aproba nan hopi mas lihe, hasta den un dia. Mientrastanto otro ciudadano mester warda hopi añanan pa haya un contesta final.

Bon Dia Aruba a entrevista e minister e aña aki riba esaki pa trece claridad. El a declara cu semper por manda e minister tambe un carta y e ta obliga pa contesta esaki. Segun e, esaki no ta un cambio di procedura. Hende mester keda haci nan peticion na DIP pa tereno. Pero si nan kier manda su persona un carta, esey por y e mester haci cu ne. Na DIP sra. Dammers a bisa den un otro entrevista cu ‘nos lo trata casonan cu ta bin for di minister prome, como cu e minister ta nos hefe’.

Areanan di proteccion
Organisacion ambiental Aruba Birdlife Conservation a emiti un comunicado unda ta bolbe subraya cu despues di cinco aña, nan no a haya ningun update riba e status di e 16 areanan cu mester keda protegi. “Un decision unanimo den parlamento, un peticion firma pa mas cu 11,000 persona y hasta esfuerso di Princess Beatrix, mama di Rey Willem Alexander, pa protege e 15 areanan cu resta bao Parke Nacional Arikok, ainda no a genera ningun resultado.” ABC a señala tambe con ultimo tempo mester a hiba gobierno corte tanto biaha pa purba preveni areanan (wetlands) importante keda otorga pa desaroyo di condominium.

‘Ningun progreso den ley ambiental’
E comunicado ta sigui subraya cu: “Desafortunadamente, no tin ningun progreso den leynan di medio ambiente tampoco. E acto policial anticua politieverordening, milieuverordening y natuurverordening, no a wordo renoba. Recientemente a introduci un lista di proteccion di especienan sin consulta apropiadamente cu NGO’s y otro partnernan. Tambe, diferente especienan proponi riba e lista inicial a keda elimina.” ABC ta relata cu ta un desapunto con tiki e gobierno a haci den ultimo ocho aña pa locual ta trata conservacion di naturalesa. “Sinembargo, despues di eleccion di diabierna awor, Aruba Birdlife Conservation lo continua di haci nan esfuersonan menciona, no importa resultadonan di eleccion.” Nan ta conclui den nan comunicado cu nan ta spera cu siguiente gobierno lo tuma conservacion di naturalesa na serio.