(NLTimes) – Pa causa di cierto incertidumbre tocante e “caracteristicanan importante” di e variante Omicron, e Outbreak Management Team (OMT) no ta den fabor di relaha e medidanan di COVID-19, fuera di e reapertura di scolnan.

Pa awo, e expertonan ta calcula cu “lo tin mas espacio pa relaha e medidanan na final di januari.” Pa ora cu e tempo aki yega, e campaña pa ricibi dosis extra ya caba lo a completa y e speransa ta cu e plamamento di e virus lo baha suficientemente. OMT lo trata e decision aki cu mas detaye riba diabierna.

Dononan di trabao tabata frustra cu e conseho di OMT. Algun a bisa cu e Gabinete mester caba cu e aparencia publico di OMT. “Bo ta crea hopi intrankilidad. Nos ta birando loco,” director di e asociacion di tiendanan INretail, Jan Meerman a conta De Telegraaf.

Varios tabata disgusta cu e Gabinete aparentemente ta actua solamente a base di loke OMT ta bisa, y no ta tene cuenta cu e necesidadnan di e doñonan di tienda. “E ta increibel cu nos ta e unico pais den un ‘lockdown’,” presidente di e union di hospitalidad Robert Willemsen a bisa.

OMT tabatin varios calculacion pa diferente situacion. Ora cu scol primario y secundario habri bek riba dialuna, esaki ta premira di causa un :ola di infeccion” cu lo bira pio durante fin di januari y comienso di februari. Segun OMT, e hospitalisacionnan cu lo resulta di e ola aki lo permanece relativamente limita. E cantidad di pashent den ICU por aumenta na un maximo di 620 pashent di COVID-19. Actualmente, tin 475 persona den ICU relaciona cu COVID-19.

OMT a bisa cu un grado significante di incertidumbre ta permanece ainda rond di e factornan aki. Por ehempel, te ainda no ta cla con contagioso Omicron ta en realidad, con halto e chens di hospitalisacion ta y con efectivo e vacunanan ta.

Investigacionnan preliminar di United Kingdom a demostra cu Omicron ta plama hopi mas facil cu e variante Delta, pero ta causa menos hospitalisacion. Aunke Omicron ta aparenta di ta mas leve cu Delta, te ainda tin un riesgo cu e por abruma e sistema di cuido di salud, OMT a bisa.

Ademas, aparentemente vacuna ta menos efectivo contra di Omicron compara cu e variantenan anterior. Den nan conseho mas recien, OMT a cita investigacion Britanico cu un ‘booster shot’ lo ofrece 65 pa 75 porciento di proteccion contra un infeccion cu sintoman. Sinembargo, segun e figuranan preliminar Britanico, despues di 10 siman, e efectividad aki ta baha te cu 40 pa 50 porciento. Despues di un ‘booster shot’, hende ta 80 pa 90% proteha contra di hospitalisacion. Con largo e proteccion aki lo ser manteni lo bira cla cu mas investigacion.