Segun Otmar Oduber, 60% di pensionado no ta ricibi mas di 900 florin pa luna

Durante su ultimo conferencia di prensa, ex minister y politico Otmar Oduber a toca e tema di pensionadonan na Aruba. El a resalta cu e situacion di e pensionadonan na Aruba, adultonan mayor, no ta bon y mester atencion urgentemente.

Oduber a remarca cu na Aruba tin entre 23 mil y 25 mil pensionado cual ta casi 28% di comunidad di Aruba cu ta biba di un pensioen. “E situacion di e pensionadonan no ta bon. Nos por keda cera wowo pe, pero e ta creando un problema enorme pa nos comunidad,” el a enfatisa.

El a sigui indica cu di e entre 23 mil pa 25 mil pensionado na Aruba e 60%, cual ta alrededor di 14 mil pensionado, no ta ricibi mas cu 900 florin di entrada pa luna.

“Con bo ta biba cu 900 florin pa luna? Den ki condicion bo kier pa nos grandinan cu ta riba 65, 70, 75 aña biba? Ken ta papiando di esaki? Nos a lanta un ministerio di adultonan mayor, dos aña caba pa cuido di adulto mayor, kico ta wordo discuti? Unico cos cu tin discuti ta ban bringa cu e un organisacion cu tin cu ta cuida nos grandinan cu ta SABA,” el a señala.

Oduber a subraya cu tin un problema enorme ora cu ta trata e pregunta di unda e hendenan grandi ta bay keda ora nan yega e edad di cu nan mester di bay keda na un luga di cuido. Segun e politico tin un lista di espera di centenares di hende cu no por cuida nan mes, cu no tin famia den comunidad pa wak pa nan.

“Nos pensionadonan ta wordo castiga ariba tur nivel,” el a bisa. El a sigui splica cu e pensionadonan ta paga practicamente 100% di e contribucion di prima, cual, segun Oduber ta señala, ta un averahe di 5 biaha pa 10 biaha mas hopi na prima cu un miembro di parlamento ta paga.

“Esaki ta algo cu ta fundamentalmente robes y niun hende ta papia di dje. Tin un discriminacion enorme den nos comunidad. E medidanan ultimo den AZV ta traha 100% contra e salud di nos pensionadonan. Netamente esnan cu mas tin mester di e remedinan,” el a agrega.

El a indica cu na Aruba, no a percura nunca como pais pa tin un programa di salud pa cuida hende manera debe ser y aworaki e pensionadonan ta wordo kita na remedi. “For di e 900 florin pa luna nan kier pa nan bay cumpra mas remedi tambe pa nan por biba,” Oduber a enfatisa.