Asociacion Nicaraguense Pro Derechonan Humano (ANPDH) ayera diahuebs a denuncia cu Gobierno di Nicaragua ta viola derechonan humano y constitucional di nan propio ciudadano, ken no por drenta nan mesun pais sin un prueba negativo di Covid-19.
E secretario ehecutivo di ANPDH, Alvaro Leiva, ken ta den exilio na Costa Rica desde 2018, a bisa den un video conferencia cu tin mas di 200 Nicaraguense pega na frontera entre Costa Rica y Nicaragua, debi na e prohibicion di gobierno pa drenta na e pais.
“200 Nicaraguense ta pega di forma inhusto, simplemente pa su derecho humano y constitucional, nan tin derecho di haya asistencia di Estado cu un regreso sin restriccion ni obstaculo”, Leiva a afirma.
“Ningun Nicaraguense por ta restringi di bay back na su pais” pasobra esey ta “un violacion flagrante di derechonan humano y constitucional”.
Tambe el a enfatisa cu ANPDH ta haciendo “tur gestion necesario” na nivel local y internacional pa e personanan aki por bay back nan pais of pa cu Gobierno di Costa Rica lo permiti pa nan bay back na Costa Rica mes.
Leiva a comenta cu e situacion a wordo denuncia caba na Comision Inter Americano di Derechonan Humano y oficina regional di Halto Comisionado di Nacionnan Uni pa Derechonan Humano.
Desde diaranson ultimo migrantenan Nicaraguense a cera frontera pa autonan no por pasa como un medida di presion pa cu lo permiti nan pa drenta na su pais.
Direccion di Migracion di Costa Rica a informa cu e personanan aki a efectua e proceso di migracion corespondiente pa Sali for di e pais ey, pero e ora di drenta na Nicaragua autoridadnan a impedi su entrada.
