Nos a caba di habri un aña nobo 2020 y Monseñor Luis Antonio Secco, como guia spiritual y religioso di nos Diocesis, a expresa su bon deseo y bendicion na henter nos comunidad.
Monseñor Secco a bisa cu durante henter aña nan ta bay traha riba e balor cu nos a ricibi sacramento di bautismo pa nos por desaroya un vocacion cu ta un mision pa biba bo bida cu hopi amor y fe. Pero tambe cu hopi speransa y bira misionero den sentido cu bo ta yuda bo prohimo.
E ta haya cu e problema cu nos ta mira ta cu hopi hoben no ta haya e amor y cariño na cas. Esaki ta haci cu di mes, nan ta desaroya cierto manera di biba cu resistencia y rabia. “Nan ta warda esey den nan curason.” Y si mayornan y scolnan no ta yuda supera e mucha cierto traumanan y cierto falta di cariño, respet y amor na cas, e ora ey nos ta haya un sociedad cu adulto cu ta trece mas problema.
Den esaki e ta mira cu e medionan di comunicacion no ta yuda, ya cu e medionan di comunicacion ta desaroya of transmiti cosnan negativo. “Pero laga nos tur para keto y forma un unidad, y esey mi ta desea pa e aña nobo”, el a bisa. Nos tur -segun Monseñor- tin cu transmiti e balor di un bida positivo. Un mision cu Dios a duna cada un di nos pa nos por transmiti e balor di alegria, paz, union y husticia.
Nos tin un mision.
Den cuadro di e cambio di aña, Monseñor Secco a declara na Bon Dia Aruba cu na e ocasion aki e kier rescata parti di e mensahe cu Papa Francisco a yega di duna nos na luna di october ultimo.
E tin di haci cu cada un di nos tin un mision y e mision ta: Dios a manda nos pa biba nos fe dor di bautismo. Cu esaki e Sumo Pontifice kier bisa na henter mundo Catolico cu nos ta hende cu a ricibi un mision. “Bo bida ta un mision. Bo famia tin un mision.”
Cada cos cu nos ta haci ta manera cu Dios a manda nos pa haci’e. Cu nos a ricibi bida pa nos desaroya un mision den nos mundo. Pues bo no ta un hende sin un meta y sin un fin cu bo ta bisa bo mes pakico mi ta bisa… cual ta e mision cu Dios a duna mi for di e momento cu mi a nace.
