Segun informe ricibi for di Aruba Airport Authority, ta premira un crecemento drastico den capacidad di asiento den aña 2019. Despues cu a registra un aumento di 6% di pasaheronan procedente di vuelonan comercial den e prome seis luna di 2019, e siguiente 6 luna ta demostra un crecemento continuo.

Segun un comunicado di gobierno, Minister Dangui Oduber ta sumamente satisfecho, ya cu poco dia pasa AHATA tambe a anuncia cifranan sumamente positivo y solido den comparacion cu e aña anterior. “Esaki unabes mas dunando hustificacion cu e maneho di turismo di Oduber ta uno di aplaudi y cu ta dunando resultado.”

Ta premira cu e porcentahe di capacidad di yegada pa cu e mercado Mericano lo aumenta te na un maximo di 11,7% (109.434 asiento adicional) pa fin di 2019. Esaki ta basa riba e actual schedulenan publica. E desaroyo aki ta wordo impulsa principalmente debi na destinacionnan nobo, mehoracion, como tambe e aumento di frecuencia di e vuelonan di aerolineanan existente.

Durante e ultimo añanan, e partnership strategico solido entre e entidadnan local y e aerolineanan a conduci na un aumento di 208.429 di e cantidad di asiento pa loke ta trata e mercado Mericano, contribuyendo asina na un resultado positivo den e industria turistico en general.

For di Merca, ademas di cu aña pasa a agrega den nan schedule servicionan nobo for di Dallas – Fort Worth (DRW) y servicionan depende e temporada for di Chicago (ORD), recientemente American Airlines a anuncia nan servicio durante full e aña riba diasabra, entre Aeropuerto Internacional Reina Beatrix (AUA) y Aeropuerto La Guardia (LGA) na New York.

Esaki ta algo impresionante pa Aruba, mirando e hecho cu inicialmente a introduci e servicio aki como un servicio cu ta basa riba temporada. Ta opera e vuelo un bes tur siman riba diasabra cu avion Boeing 737-800 cu capacidad di 16 asiento den First Class y 144 den main cabin.

Banda di esey, motiva pa factornan di gran influencia, e aerolinea ta planea pa aumenta su servicio for di hubnan clave, manera Charlotte y Philadelphia, durante e simannan mas druk.

Alabes, ta importante pa menciona cu Charlotte ta e di dos hub mas grandi di Merca y e di seis aeropuerto mas druk den e pais, basa riba trafico di avion.

Cu e expansion extensivo den e red di ruta, American Airlines ta reconkista su posicion como e compania lider na Aruba referiendo aki na e capacidad di asiento door di ofrece vuelonan directo pa 5 diferente gateway.

JetBlue lo continua cu nan Airbus 159 cu capacidad di 159 asiento, brindando servicio completo tanto for di New York como Boston pa Aruba, mientras cu nan ta aumenta e capacidad di asiento den cierto simannan mas druk.

JetBlue ta ofrece un di tres gateway nonstop pa Aruba for di Fort Lauderdale, cu conexionnan den e red creciente di JetBlue.

Sinembargo, debi na e situacion competitivo di e mercado na South Florida, e aerolinea a dicidi di reduci nan vuelo diario pa 5 vuelo pa siman, cuminsando januari 2020. Esaki ta haci cu e vuelonan planea ta bira 150 pa luna, for di e tres gateway menciona. Esaki ta cuadra cu empeoramento di e mercado mundial, tensionnan riba e mercadonan creciente y e debilitacion di confiansa den hacimento di negoshi. Ta spera un logro similar pa e resto di 2019 relaciona cu e mercado Mericano.

Oduber ta sumamente satisfecho cu e prestacion di nos aeropuerto y Aruba como destinacion, no obstante e perdida di e di dos mercado mas grandi cu ta Venezuela, segun e comunicado. E trafico Mericano creciente ta yuda yena e bashi cu a keda di e mercado Venezolano. Di otro banda, e crecemento slow cu ta spera for di Latino America den e di dos mita di 2019, hunto cu e retonan preocupante incluyendo e grounding di Boeing 737 Max, e aumento di e costo y e perspectiva mundial debil, e mercado di Latino America por lo general ta priminti di crece, segun e comunicado ta finalisa.