Ayera mainta, sindicato FTA a bay dilanti di bestuurskantoor cu un grupo di trahadonan di e diferente scol cu ta cay bou e capa di Stichting Verstandelijk Gehandicapten (SVGA) pa atende cu asunto di pago atrasa di promocion.

Esaki ta e tercer reunion cu sindicato FTA, representando e trahadonan di SVGA, a sostene cu gobierno, representa pa minister di Asunto Social, Glenbert Croes. E sindicato kier un solucion pronto, ya cu e ta un asunto cu tin varios aña andando.

Segun e lider sindical di FTA, Rudy Geerman, e accion aki no lo afecta e clientenan di SVGA, ya cu nan tin un responsabilidad cu e muchanan special, y tabatin hendenan cu a keda trahado. “Nos ta hopi responsabel! Nunca nos ta laga e luga bashi,” el a bisa na prensa.

Nan no tabatin niun documento of manifiesto pa entrega na e mandatario Glenbert Croes. Pero si nan kier a papia prome cu e mandatario pa crea un compromiso of acuerdo. Despues nan lo manda un protocol a base di loke nan a palabra den e reunion di ayera. Tambe nan lo conveni un fecha limite, a base di nan deliberacion.

Considerando cu SVGA ta un fundacion, Geerman a bisa cu e directiva mester asumi su responsabilidad tambe, ya cu nan no por keda presiona riba e mandatario so. Nan tin un reunion pendiente cu e directiva di SVGA den e prome siman di augustus.

Geerman a indica cu e trahadonan no por warda mas. A pesar cu consecuentemente minister di Asunto Social a priminti di haci un esfuerso, pero nada no a tuma luga. E situacion aki ta data for di 2016, y aunke nan a yega di trece e problema aki cerca e gobierno anterior, no por a yega na un acuerdo. Geerman a bisa cu nan a yega di protesta tambe e tempo aya. Na momento cu e gobierno di coalicion aki (MEP-POR-RED) a sinta, nan a yega di reuni dos biaha caba cu Croes.

Areglo di subsidio nobo
Prome cu nan a reuni, Croes a expresa cu lo trece e asunto aki den Conseho di Minister cu a reuni ayera mainta mes. “Mi ta asumi mi responsabilidad pa busca solucion pa nan,” Croes a bisa. El a keda di propone un solucion y honra tur e promocion pendiente prome cu januari 2017 den e reunion di Conseho di Minister.

E no a bisa cuanto lo ta e suma, pero si e minister a laga sa cu esaki no lo sali di e 36 miyon florin cu parlamento a aloca pa atende cu e Crisis Plan Social di tres aña.

E punto di salida lo ta cu derecho adkiri di e trahadonan mester wordo cumpli, honra, respeta y paga. Croes a bisa cu nan ta atendiendo e crisis social cu seriedad, y no ta asina cu nan tin e trahadonan den sector social trahando desanima.

El a agrega cu gobierno tin full comprension pa e trahadonan di SVGA cu a bay manifesta. Como minister di Asunto Social e ta señala cu e eror di mas grandi cu a yega di sosode ta dia cu cu gobierno anterior a bin cu ‘auto-subsidie’ cu a manca tur fundacion. Tur hende nan promocion di 2017 padilanti no por wordo paga, y practicamente e derecho di tur trahado pendiente di promocion a wordo elimina. Pa atende e asunto aki, Croes a bisa cu tin un comision cu ta evaluando un areglo di subsidio nobo pa bay honra e derecho adkiri di e trahadonan di e fundacionnan cu a keda colga.