Minister di Finansa y Economia, Xiomara Ruiz-Maduro a laga sa cu e regla 5 cu e instancia internacional, Organisacion pa Colaboracion y Desaroyo Economico (OESD), a bin cune y cu cual Aruba mester a cumpli a base di compromiso adkiri, tin di haci cu cierto servicionan a wordo saca for di Freezone.

Esaki kiermen cu no mester practica mas den e zona legal di Freezone, por ehempel: Servicio di abogacia, notariado y tambe e parti di propiedad intelectual. Kiermen nan ta sali for di e ‘ringfencing’, caminda den e Freezone nan ta wordo beneficia di paga cierto belasting, compara cu esunnan cu ta opera pafo di Freezone.

El a aclaria cu e suspension di e servicio aki no kiermen cu e Freezone ta bay caba. Sino cu e ta bay sigui cu e reglanan manera a keda stipula internacionalmente. “Esey ta un di e reglanan cu nan ta bisa cu no por tin”, segun Ruiz-Maduro.

Den e cuadro aki nos ley di Freezone tabata contene e parti di ‘ringfencing’, y den e aprobacion den Parlamento, a haci e cambio necesario den e ley di Freezone. E mandatario ta aclaria cu esaki no kiermen cu Freezone ta keda sin existi. Ya cu e cambio haci ta concerni na e parti di servicio y no di producto cu ta wordo realisa den e Freezone.

“E parti di producto si ta keda. No mas cu e ley ta duna na e minister e apoderacion tambe pa por bin cu un decreto gubernamental den cual por pone cual ta e servicionan cu si ta wordo permiti pa tuma luga den locual ta bira Freezone,” el a bisa.

Decreto gubernamental.
Unabes cu e regla aki a keda introduci den e ley di Freezone, e parti di e decreto gubernamental -segun e mandatario- ta wordo traha.

Lo trata e decreto aki den concordancia cu e reglanan di e instancia OESD pa e por cumpli debidamente cu nan. Den dje tin servicionan relaciona cu e plan di e seis sector cu potencial economico cu gobierno a yega di presenta, entre nan e sector primario di agricultura, cu por wordo haci den Freezone, el a bisa. Tambe actividad cu tin di haci cu logistica.

“Nan ta sector prometedor pa diversificacion di economia di Aruba, entre otro, por ehempel, agricultura,” el a declara na e matutino aki.

Na final di su declaracion, minister di Finanzas y Economia, Xiomara Ruiz-Maduro a expresa su satisfaccion cu e cambionan den e ley di ley di Winstbelasting y di Freezone cu a wordo aproba na tempo y unanimamente.

Tanto na inicio di e reunion y na final di dje, e mandatario a gradici parlamento pa nan sosten, pero tambe tur instancia y personal di gobierno cu a traha riba e cambionan aki. E ta considera e hecho aki hopi importante, pasobra e ley mester wordo pasa, pero tambe anuncia prome cu dia 31 di december proximo.

Si no haci esaki debidamente y pais Aruba no ta cumpli cu e compromiso internacional aki, ‘nan ta bolbe pone nos ariba un lista di e paisnan cu no ta cumpli,’ el a bisa. Kiermen nan ta paisnan cu ta un paraiso fiscal pa evasion di impuesto y Aruba no ta cay den dje.