Como un ‘confusion’ cu ta treciendo division den nos pueblo y falta di confiansa den nos mandatario, asina Minister di Asunto Economico y Financiero, Xiomara Ruiz-Maduro a cualifica e dos cartanan di CAft ayera. Un carta cu a wordo manda pa Gobierno y tambe pa Conseho di Minister di Reino, y otro carta cu a wordo manda pa Parlamento di Aruba.

E mandatario, kende a referi na varios punto den contenido di e cartanan, a cuminsa riba e hecho cu ambos carta ta cuminsa diferente, specialmente e carta cu a wordo manda pa nos organo legislativo. E ta haya cu esaki ta algo nobo, ya cu nunca e colegio di supervision aki a manda dos diferente carta.

Maduro a abstene di divulga na prensa e carta cu nan mes a haya for di CAft, y cu ta consisti di 5 pagina (y tambe anexo), ya cu e ta un carta ‘secreto’ reserva na nivel di gobierno y cu nan no por divulga publicamente. Den e anexo of pagina adhunto, CAft ta bay extensivamente pa argumenta e motibo pakico nan ta manda pidi Conseho di Minister di Reino un ‘aanwijzing’ pa Pais Aruba.

Sinembargo, durante e conferencia di prensa aki, e dos carta a wordo exhibi como un prueba di nan existencia. Den e carta cu gobierno a ricibi for di CAft dia 23 di september ultimo -segun e mandatario- nan a haci un peticion pa Aruba haya un ‘aanwijzing’ (instruccion) relaciona cu su maneho di presupuesto 2019. E motibo di esaki ta cu e organo aki a conseha pa e presupuesto por wordo cambia pa incorpora e Social Crisis Plan den dje.

E otro carta di CAft cu a bay Parlamento y cu e mandatario a haci referencia di dje, tin e fecha di dia 24 di september ultimo. Esaki ta e carta cu ta publico riba e website di CAft. E ta cualifica cu e ultimo carta aki di e organo di supervision ta esun cu a causa un ‘conmocion’. El a bisa cu e conmocion aki tin di haci cu e carta aki, conforme e ley di LAft (Landsverordening Aruba financieel toezicht), ta indica cu CAft ta manda e corespondencia unda ta pidi un ‘aanwijzing’ pa pais Aruba. E organo aki ta manda un notificacion a base di articulo 12 inciso 3, unda ta señala cu e colegio ta manda e conseho aki describi den ley, y un copia di esaki ta bay pa e minister.

Sinembargo tambe nan a manda un carta pa Parlamento di Aruba, unda CAft ta informa cu a pidi un ‘aanwijzing’ pa gobierno, y tambe motivacion pakico nan ta pidi esaki. Segun e mandatario, CAft solamente a manda e mita di e motivacion. “Cu otro palabra, el a manda bisa e mita berdad”, el a declara.

Ruiz-Maduro ta considera cu pa medio di e ‘mita berdad’ di CAft su carta manda pa Parlamento, a start un discusion cu no ta yuda nos pais, ya cu ta creando un confusion. Maduro no a vacila pa bisa cu den e caso aki CAft ta birando un instrumento pa crea un discusion den pueblo y panico.

Den esaki, e mandatario a señala den e reaccionnan cu gobierno ta bin hayando despues di CAft su carta, hustamente nos ta haciendo locual nan ta mira cu Hulanda kier. “Pa e pais aki ta dividi y pa asina nos no por conoce progreso”, el a expresa. Te hasta pa nos duda di nos propio hendenan, duda di un gobierno y crea discusion, caminda prome minister ta wordo tilda di gañado, el a agrega.