Segun minister Xiomara Maduro: Ocho miyon presupuesta pa vacatura di personal tin su splicacion

Minister Xiomara Maduro a referi riba un suma di 8 miyon presupuesta pa vacatura y cu – segun e organo di supervision financiero CFT su recomendacion – nan tin cu ‘scrap’ for di concepto di presupuesto 2021.

Sin bay mucho den detaye ni splicacion e mandatario a expresa cu e 8 miyon destina pa vacatura di personal tin su motibo y splicacion cu gobierno a duna na CFT.

Sinembargo pa e mandatario encarga cu finanzas y asunto economico tin un contesta y splicacion. E parti mas breve di minister Maduro su splicacion ta: CFT no ta compronde e dinamica riba con gobierno a yega pa presupuesta e suma ey.

E ta haya cu debi cu CFT no ta compronde e dinamica aki, gobierno ta haya e tipo di conseho preto riba blanco den e carta di e organo di supervision financiero aki. Pero tambe CFT mester compronde kico e presupuesto aki kiermen pa locual ta trata e parti aki di gasto di personal. Pero con e parti di personal ta hinca den otro.

E ta haya cu CFT mester cambia su manera di traha ora cu nan ta presenta un conseho pa Gobierno di Aruba. Nan mester duna espacio pa gobierno por duna un splicacion riba nan preocupacion. Tambe el a reacciona bisando cu no ta pasobra CFT a pone den su rapport, esey kiermen cu e ta e solo berdad, y no ta existi otro berdad. Of cu no tin un splicacion pe.

P’esey e ta haya cu hopi biaha e tipo di rapport aki mester bin tambe cu e splicacion di gobierno pa bo por haya e ‘contexto den cual nos mester traha.’ Te hasta e ta haya cu tin biaha CFT mes no ta compronde e contexto ey. “E ta un discusion casi perdi cu nan,” el a bisa.

El a declara cu pa varios biaha el a yega di tin su diferencia cu CFT, pasobra nan ta traha un rapport y bin den publicidad cune, prome cu e mes como minister di finanzas y asunto economico por a hay’e.

Prome cu e por skirbi algo pa CFT –segun e mandatario – ya caba prensa ta riba dje pa cuestiona su maneho riba finanzas publico. Pero e rapport di CFT no tin gobierno su splicacion pa asina prensa y pueblo en general ta lesa su rapport pa nan por trece den balans e contexto corecto, asina e mandatario a laga sa.