Memey di e crisis di COVID19 tin un crisis tambe den e compania sui generis Serlimarpa cual poco tempo pasa a pidi ‘surseance van betaling,’ esta un suspension den pago di debedornan. Na e mesun momento a cuminsa circula un rapport den prensa traha pa e compania Grant Thornton den cual ta sugeri cu Gobierno lo ta debe Serlimar 72 miyon florin y e conclusion ta wordo saca cu esaki ta un di e motibonan cu Serlimar lo ta mal para financieramente. E conclusion aki ta robes, segun Maduro, ya cu no ta asina cu Gobierno ta debe Serlimar 72 miyon florin.
Gobierno ta paga Serlimar pa su servicio
E suma di 72 miyon florin cu Grant Thorton ta yega na dje, no por wordo considera como un debe di Gobierno na Serlimar, segun un comunicado di prensa di gobierno. Esaki ta e suma cu ta e diferencia entre locual Serlimar a pidi pa ofrece Gobierno su servicio y locual Gobierno a yega na un acuerdo cune via un ‘dienstverleningsovereenkomst’ DVO pa paga Serlimar pa e servicio duna. Gobierno no ta subsidia Serlimar, Gobierno ta cumpra servicio for di Serlimar. P’esey no por papia di ‘Landsbijdrage’ tampoco, sino di DVO. Pues e conclusion cu Gobierno debe Serlimar 72 miyon florin no ta cuadra cu realidad. E lo tabata mihor pa promer cu a saca conclusion pa a verifica e cifranan aki cu Minister di Finanzas of cu Gobierno su Departamento di Finanzas, pero manera e rapport mes ta menciona, Grant Thorton a usa solamente e informacion for di e administracion di Serlimar pa traha su rapport y no a tuma contacto cu gobierno pa verifica e sumanan.
Rapport no a wordo entrega na Gobierno
Mester remarca cu e rapport aki di investigacion financiero na Serlimar haci pa Grant Thorton, no a wordo entrega na Gobierno pa asina Gobierno por a duna un comentario oficial riba esaki. Sigur pa locual ta trata e parti den cual ta sugeri cu Gobierno debe Serlimar un suma basta substancial, un reaccion y splicacion lo tabata na su lugar. Ta den prensa Minister di Finanzas por a tuma nota di e rapport aki. Pasobra hasta ora cu a puntra pa e rapport aki den reunion cu e director di Serlimar, Minister di Infrastuctura y Medio Ambiente den presencia di abogado Rep como ‘bewindvoerder,’ Minister di Finanzas a haya e contesta cu e rapport no por wordo duna oficialmente ya cu e ta traha solamente pa Serlimar y si mand’e pa otro hende lo mester paga Grant Thorton un boet.
Gobierno a bin ta cumpli cu tur pago na Serlimar
Ta bon pa informa cu Gobierno a bin ta cumpli cu tur pago na Serlimar conforme e DVO cu tawordo firma. Pa aña 2020 esaki ta un suma di 21.6 miyon cu Gobierno ta paga Serlimar pa su servicionan. Di e suma aki, ya caba Gobierno a pasa 17.3 miyon por medio di voorschot faltando solamente 4.3 miyon pa caba di cumpli cu pago na Serlimar pa servicio den aña 2020. Recientemente Parlamento a apodera Minister di Infrastuctura y Medio Ambiente pa pone 6.5 miyon adicional di su ministerio na disposicion di Serlimar, pero e suma aki lamentablemente no por a wordo aloca den e presupuesto di e ministerio y consecuentemente pa por yega na e fondonan adicional aki, lo mester bay cambia Presupuesto di Pais Aruba pa asina por busca financiamento adicional pa e 6.5 miyon aki. Los di esaki, sigurfor di Ministerio di Finanzas, tur pago pendiente na Serlimar a wordo haci y no tin ningun debe habri di pago di servicio di Gobierno na Serlimar. For di e mesun informacion acumula pa Grant Thorton por mira cu den 2018 Serlimar a hasta haya 3,5 miyon extra y na 2019 a haya e 20 miyon cu nan pidi pa nan servicio. Pues di parti di Minister di Finanzas Maduro, Gobierno a cumpli cabalmente cu Serlimar.
