Ayera den Parlamento di Aruba Minister di Economia, Comunicacion y Desaroyo Sostenibel, Geoffrey Wever, hunto cu Departamento di Asuntonan Economico, Comercio y Industria a brinda un actualisacion di e Economic Outlook 2023-2024.
Mediante un comunicado di prensa Minister Wever a informa cu manera a indica
durante tratamento di presupuesto 2024 di Pais Aruba den december 2023, e actualisacion aki ta representa un ahustacion di e Economic Outlook 2023- 2024 publica den juni 2023 y ta basa riba ultimo informacion disponibel di economia di Aruba.
Den e Economic Outlook di juni 2023 Departamento di Asuntonan Economico,
Comercio y Industria a premira un crecemento economico di 10.1% nominal den 2023 y pa 2024 un crecemento di e economia di Pais Aruba cu 4.6% nominal.
Segun e Economic Outlook 2023- 2024 di December, Departamento di Asuntonan
Economico, Comercio y Industria ta ahusta e proyeccion di crecemento di economia di Aruba pa 2023. Basa riba analisis di ultimo lunanan di 2023, ta premira cu economia a crece cu 13.7% pa yega un balor di 6.8 miljard florin, esaki ta igual na 112.1% di e nivel di 2019 (6.0 miljard florin).
E comunicado ta indica cu pa 2024, segun calculacionnan di Departamento di Asuntonan
Economico, Comercio y Industria, ta premira un crecemento di 3.0% den termino
nominal di e Producto Interno Bruto (PIB). Cu un balor di 7.0 miljard florin, esaki ta igual na
115,5%% di e nivel na 2019 (6.0 miljard florin).
Minister Wever ta indica cu e expansion di actividadnan economico pa 2024 ta basa riba crecemento di e industria turistico y crecemento di consumo y inversion priva.
“Esaki ta demostra confiansa den nos isla como destinacion turistico y pa inversion. E revision di proyeccion di crecemento di economia di Aruba ta den liña cu e ultimo di
expectativa economico di Centrale Bank van Aruba cu ta premira un crecemento economico di 4.0% den termino nominal den 2024,” el a remarca.
El a sigui splica cu pa facilita proyeccion di e economia di Aruba, DEACI ta haci uso di e modelo macro-economico MARUBA. E modelo MARUBA ta basa riba e Cuentanan Anual di Pais Aruba publica pa CBS y ta refleha e funcionamento di e economia di Aruba y maneho di e modelo MARUBA ta cay bao responsabilidad di DEACI.
Segun e mandatario ta indica, pa yega na e proyeccionnan economico, DEACI ta den dialogo continuo cu diferente instancianan y expertonan local, y a base di analisis di diferente desaroyo, ta produci proyeccionnan economico.
