Durante conferencia di prensa ayera mainta, Minister di Husticia y Asunto Social, Rocco, Tjon a splica cu e proyecto pa un KIA nobo ta den continuacion, pero tin diferente stap cu mester tuma prome cu por duna inicio na e proyecto aki.
Durante e ronda di pregunta, Minister Tjon a contesta pregunta tocante e proyecto pa un KIA, di cual Minister di Husticia Anterior, Andin Bikker, a papia di dje durante su mandato. El a indica cu e proyecto ta den continuacion.
E dossier pa loke ta e proyecto aki ta data back na 2018-2019. Minister Tjon a splica cu tin diferente combersacion cu Gobierno di Aruba a hiba ariba e topico aki cu coleganan Hulandes y a palabra cu nan cu pa september di e aña aki nan kier tin e dossier di e proyecto aki completamente actualisa y pa logra esey Aruba ta bay haya asistencia tecnico for di Ministerio di Hulanda
“E meta ta pa september tin e dossier aki actualisa pasobra un bes tin e dossier actualisa, nos sa kico e ta bay costa, nos sa con e instituto nobo lo bay ta teniendo na cuenta tur e diferente facetanan, entre otro tambe e cuido forensico y e ora lo mester tuma un decision pa wak con ta bay financia esaki pa e trabaonan por inicia,” el a specifica.
Pa loke ta otro pregunta tocante e situacion na KIA actualmente, director di KIA y tocante e management cu lo cuminsa traha na KIA. El a splica cu tin diferente punto cu mester atencion na KIA. Minister Tjon a referi na e rapport di CPT cu a wordo emiti caminda nan a nota 63 recomendacion pa Aruba cu mester su debido atencion y tambe diferente otro proyecto.
Banda di esey, el a agrega, director di KIA a indica cu e tin cuater aña realisando e trabao di director y el a caba di percura pa full e reorganisacion keda cla. Segun Minister Tjons ta informa, e director a indica cu e kier un reto nobo y a tene combersacion cu e director hunto cu DRH y e reto nobo aki cu e ta desea ta bay wordo formalisa dentro di poco, pero mester tene cuenta cu e diferente puntonan cu mester atencion.
“No por laga un buraco existi y pa e motibo ey for di awe tin un management team a cuminsa, en espera di formalisacion di e reto nobo pa cu e director y na e momento ey e vacatura lo wordo habri pa tur hende por solicita,” el a finalisa.
