Dialuna 4 di september a tuma luga un reunion publico na unda Parlamento di Aruba a trata e Presupuesto Supletorio di aña 2023. Cada minister a contesta preguntanan di miembronan di parlamento pa duna splicacion y brinda informacion ariba cambionan of duna actualisacon ariba proyectonan.

Minister di Husticia y Asuntonan Social, Rocco Tjon, a contesta varios pregunta di diferente miembro di parlamento cu a toca tanto e parti di husticia como e parti di asuntonan social.

Un di e preguntanan dirigi na e parti di husticia tabata trata tocante particularmente e edificio nobo pa Cuerpo Policial na Oranjestad, eWarda di Playa.

Minister Tjon a remarca cu e mudansa aki tabata algo di urgencia pa Cuerpo Policial mirando e situacion di e edificio bieu cu nan tabata den dje anteriormente y pa e motibo ey, a corto plaso a percura pa nan por muda.

El a splica cu esaki a keda realisa pa motibo cu a bin cu un grupo di trabao caminda Cuerpo Policial mes tabata representa tambe pa di e forma aki nos por a logra esaki. Contestando e pregunta el a indica cu e contract di huur na e edificio aki ta pa un periodo di cinco aña y e huur di e edificio ta na un balor di 35 florin pa vierkante meter.

El a agrega cu e contract di huur mes no ta cla ainda, pero den intentieverklaring por mria informacion di e huur y hopi importante tambe por wak tur e aspectonan cu a tene cuenta cune pa loke ta e parti tecnico, e parti alarma, iluminacion, sistema di camara, inercom, etc. cu specificacionnan importante pa un warda di polis.

Pa loke ta trata e proyecto na edificio di ex-Codemsa, el a splica cu esaki ta un proyecto cu a keda prepara detayadamente mirando tur e diferente servicionan cu e diferente departamentonan ta bay brinda a base di e localidad aki y ta bay tin diferente funcionalidadnan nobo cu nunca antes Aruba tabata conoce.

Minister Tjon a remarca cu full e proceso ta den man di APFA y ta encarga cu ehecucion di e proyecto aki. Segun el a sigui splica na mitar di luna di september nan ta bay selecta un consehero di destaho y un supervisor di construccion independiente. Despues di esaki ta bay selecta un contratisa y den luna di decemeber e trabao lo keda gegund pa asina cuminsa mobilisa tur e trabaonan aki pa consecuentemente na finaldi 2024 por entrega e proyecto aki segun schedule.

E mandatario a contesta pregunta tambe tocante e edificio di Family Justice Center y cuanto e huur ta. El a splica cu ta papia di un huur pa duracion di cinco aña na un balor di 27.18 florin pa vierkante meter.

El a subraya a base di un grupo di trabao cu ta consisti di Cuerpo Policial, intendentenan di Family Justice, trahadonan di Bureau Slachtofferhulp y tambe Jeugd- en Zedenpolitie, hunto a yega na e plattegrond pa tene cuenta cu tur e rekisitionan y pa por cumpli cu tur e exigencianan internacional pa loke ta trata e trabaonan specifico aki.

Un topico cu a bin na remarke tambe ta e mocion cu ta trata e plan di prevencion di suicidio. Minister Tjon a splica cu pa loketa trata e plan di prevencion di suicidio tin un grupo di trabao cu a keda institui cu ta realisa e trabaonan aki cu mester tene cuenta cu hopi aspecto.

El a sigui splica cu egrupo di trabao cu ta encarga cu esaki ta e grupo GGZ cu entre otro a traha ariba eplan a largo plaso pa loke ta trata salud mental. El indica cu tin diferente puntonan a bin pa dilanti, entre otro cu mester tin suficente trahado studia y tambe a percura pa informacion tocante esaki ta mas ampliamente disponible

El a agrega cu recientemente tabatin un curso pa Cuerpo Policial na unda nan a haya tur informacion di Mental Health Caribbean pa ora cu nan mester trata cu personanan cu comportamento incomprensibel. Na mesun momento e curso aki ta amplia e conocemento y por brinda un miho cuido na esanan cu kizas intencion di entre otro comete suicidio.

Un aspecto hopi imoprtante cu el a resalta ta cu e grupo di trabao a indica cu pa comienso di 2024 nan ta kere cu nan por tin un plan nacional na luga pa loke ta trata prevencion di suicidio. El a agrega cu e plan nacional di prevencion di suicidio lo ta enfoca ariba diferente grupo obhetivo y lo keda realisa den e diferente secotrnan.

“Di e forma aki e ta bira un plan hopi amplio y integral y si tur cos ta bon na comienso di 2024 esaki lo ta disponible y di e forma ey e por keda ehecuta,” el a bisa.

Pa loke ta e pregunta tocante e entidad di autoridad di weganan di suerte. Minister Tjon a sploca cu esaki ta bay un organisacion independiente cu ta encarga cu supervision y regulacion di e weganan di suerte na Aruba. E ta bay duna tambe concientisacion pa loke ta e parti di adiccion na e weganan di suerte.

El a enfatisa cu e entidad aki ta hopi importante pasobra tin un analisis di escena di crimen cu a keda emiti y un di e puntonan cu mester tene cuenta cune pa futuro, ta entre otro labamento, un fenomeno di criminalidad y e autoridad aki tambe lo yuda mitiga esaki a traves di e sector aki.

Pa loke ta e proyecto di ‘veilige barios’, e mandatario a indica cu e intencion ta pa practicamente stimula trabao di bario y dentro di poco lo lansa e proyecto cu e centronan dibario mes a yama ‘barionan unico’. E pensamento tras di e proyecto aki ta pa percura cu tin mas actividadnan den bario.

El a sigui splica cu ya caba tin mas personal cu a keda emplea na tur e centronan di bario pa duna contenido na diferente actividadnan. Ademas ta bay introduci proyecto y actividadnan cu ta enfoca ariba e parti social, e parti cultural y tambe trayectoria di estudio y trabao.

Minister Tjon a señala cu e luna aki of siguiente luna lo anuncia otro proyecto den cuadro di e proyecto ‘veilige barios’ caminda ta bay percura, den bon coperacion cu Ministerio di Enseñansa pa den e centronan di bario duna oportunidad na hobennan cu mester di extra guia y atencion den e parti di educacion.

Pa loke ta e parti social, Minister Tjon a realsta e cifranan realisa pa loke ta trata con e presupuestonan di Directie Sociale Zaken tabata durante tur e añanan cu a pasa.

Segun el a señala na 2014 tabatin un suma di 407 mil, na 2015 un suma di 296 mil y na 2016 un suma 270 mil. El a resalta cu bao Gabinete Wever-Croes por wak cu na 2021 a presupuesta 1.1 miyon, na 2022 esaki tabata 1.3 miyon y 2023 no a termina ainda, pero pa loke ta trata cifranan realisa por wak cu na fin di april tabatin mas cu na 2014.

“Mi kier indica un rato cu pa loke ta trata duna atencion na Departamento di Asuntonan Social pa loke ta trata e fondonan, pa loke ta trata e materialnan cu nan tin mester, esaki a keda casi triplifica si compara esaki cu Gabinete Mike Eman,” Minister Tjon a enfatisa.

Por ultimo, contestando e pregunta tocante e lista di espera di Cas Blenchi y Cas Briyante, el a splica cu Cas Blenchi aworaki no tin lista di espera y Cas Briyante tin un cliente cu ta keda evalua aworaki pa wak si e ta haya luga den un di e complehonan.

El a remarca e hecho cu e cudio cu ta keda duna door di e dos fundacionnan ta hopi costoso. “Ta diferente decisionnan cu no soalemnte gobierno, pero parlamento tambe mester haci pa hunto dicidi con leu nos kier bay den brinda e cuido aki. E ta cuidonan hopi costoso. No solamente door di e infrastructura, pero door di e personal tambe cu tin mester pa por brinda e cuido adecua na e clientenan aki,” el a subraya.

El a resalta cu den e presupuesto di deseabilidad di 2024 pa loke ta trata e fundacionnan aki, tin un aumento hopi grandi pasobra nan kier percura entre otropa e cas cu ta bashi aworaki tambe drenta den uso.