E motibo cu Minister Presidente, Evelyn Wever-Croes a trece dilanti caminda Conseho di Minister a dicidi di kita e cartera di Desaroyo Teritorial, Infrastructura y Medio Ambiente for di Sra. Marisol Lopez-Tromp a lanta controversia.

E argumento treci dilanti, cu problema interno entre partido POR y e mandatario en cuestion no a wordo resolvi debidamente, y cu e situacion aki a cuminsa tranca gobernacion y Conseho di Minister mester a busca un otro salida, ta algo discutibel ainda te hasta constitucionalmente.

Actualmente un comision di mediacion ta atendiendo e situacion aki pa bin cu un conseho pa soluciona e impasse aki. Pero e comision aki no tin un deadline pa bin cla cune.

Decision

Bon Dia Aruba a puntra minister di Enseñansa, Ciencia y Desaroyo Sostenibel, Rudy Lampe (RED) si como miembro di e gabinete actual, e por a sinti cu e situacion aki tabata afecta e maneho den gobernacion? E mandatario a declara cu berdad cu e asunto aki ta trata di un problema interno den POR. Pero e relacion di trabao ta wordo afecta pasobra tin dos minister di POR den Conseho di Minister. El a bisa cu ‘ami personalmente no tin niun issue cu minister Marisol Lopez-Tromp’.

Segun e mandatario, e no por bisa cu nan relacion di trabao cu minister Lopez-Tromp lo ta afecta. Sinembargo e ta haya cu e asunto aki ta un problema interno di POR. Pero tambe un problema entre dos minister di POR cu ta sinta den conseho di minister. Practicamente e problema interno di POR a wordo treci den reunion di Conseho di Minister, pasobra tanto Lopez-Tromp como minister Andin Bikker ta sinta eyden.

Si como miembro di gabinete Wever-Croes, minister Lampe a afirma cu el a participa den e decision cu Conseho di Minister a bin cune y cu MinPres a duna di conoce na pais Aruba.

Minister Lampe a argumenta cu ‘un gobierno ta uno y no por tin dos gobierno’. Pues un gobierno di un pais no por ta dividi. El a agrega cu ora cu un gobierno ta tuma un posicion no por tin un posicion contrario of minoritario. Den e caso aki, e ta mira cu ya sea tur minister ta para uni tras di un decision, of no tin gobierno.

Den e caso specifico aki, e ta mira cu ora ta forma un gobierno entre tres partido den Conseho di Minister no ta existi un minister independiente. Un minister ta ehecuta un programa di gobernacion cu ta firma pa tres partido. Y ora un partido ta retira e confiansa den un minister, esey ta un asunto interno di e partido, el a afirma.

El a referi cu na momento cu nan a firma e programa di gobernacion entre e tres partidonan (MEP-POR-RED), y na momento cu el a bira minister, e sa tres cos cu ta keda hopi cla pa tur minister: E prome ta cu bo ta un minister apunta pa un partido cu a firma e programa di gobernacion. E di dos tin di haci cu tur decision den Conseho di Minister ta secreto. E di tres ta cu Conseho di Minister mester ta uni.

“No por tin division den un conseho di minister,” segun minister Lampe. E mandatario no a señala ken di nan no a cumpli cabalmente cu e ‘principionan’ aki, locual por keda como un liber interpretacion.

Encuanto si minister Lampe ta kere cu esaki tabata e miho manera pa atende cu e asunto aki den seno di Conseho di Minister? Y dicon no laga e tarea constitucional aki den man di Parlamento pa medio di un mocion di censura? E mandatario a trece dilanti cu ambos decision ta mara na otro. Kiermen el a laga sa cu nan a insisti cu na momento cu e decision aki ta wordo tuma, mester entabla e procedura describi den nan programa di gobernacion.

Comision di mediacion

El a cualifica e documento aki como uno constitucional cu ta nan guia, y nan no por desvia di dje. Y den e programa di gobernacion ta stipula cu e comision di mediacion lo bin cu un conseho den caso di conflicto. Nan ta wardando aworaki ki conseho e comision menciona ta bin cune.

“Anos no por tuma conclusion prome cu e comision bin cu un conseho,” el a declara na e matutino aki. Segun e mandatario, si nan a bay di biaha pa Parlamento atende cu e problema aki, nan no ta respeta e procedura stipula den e programa di gobernacion.

Referiendo na e situacion actual, el a confirma cu Prome Minister a asumi e cartera ministerial di Sra. Lopez-Tromp, te ora cu e comision di mediacion ta bin cla cu nan trabao. Esaki tanten no tin un periodo of fecha fiho pa e comision aki entrega su conseho. Aunke e comision no tin un fecha fiho, pero nan ta spera cu pronto e comision su conseho lo wordo presenta na prome minister. “No a wordo stipula un tempo pa duna e comision e libertad pa nan scoge e ritmo di nan trabao. Pero mi por imagina cu esaki no ta tarda hopi,” segun minister Lampe.

Si e comision di mediacion lo realisa un sorto di investigacion pa determina e causa di e problema interno cu a surgi entre POR y Sra. Lopez-Tromp, minister Lampe a bisa cu nan tarea ta stipula den nan programa di gobernacion.

Ta asina cu na momento cu tin conflicto denter di e coalicion, e ora ey e comision di mediacion su tarea ta di presenta un conseho con pa resolve esaki. El a agrega cu pa bo por trece un conseho con pa resolve un conflicto ‘claro cu tin cu haci cierto analisis pa yega na bo conclusion di bo conseho.’ Si e analisis aki mester ta riba causa di e problema mes, minister Lampe no ta descarta e punto aki, entre otronan…

Corupcion

Minister Lampe analisando e situacion cu a surgi rond di partido POR y minister Lopez-Tromp, e ta considera importante cu e asunto cu ta canando ta trata di algo di procedura. “No di contenido!” El a trece dilanti cu RED den gobierno ta para pa e principio di bon gobernacion y anti corupcion. E ta haya cu henter e procedura aki ta independiente di e bon trabao of no cu un minister a haci.

E hecho cu nan a haci uzo di e clausula di e comision di mediacion –segun minister Lampe –esaki no kiermen cu nan kier tapa, por ehempel, investigacion den caso di supuesto corupcion. “Un cos no tin di haci cu otro,” el a bisa.

Como partido RED Democratico cu ta forma parti di e coalicion di gobierno, nan compromiso ta keda –segun Lampe– cu minister of sin dje. Mientras cu e gabinete ta para ariba e programa di gobernacion, nan compromiso ta keda pa sigui lucha contra corupcion.