ORANJESTAD – Como minister encarga cu Unesco, mandatario Rudy Lampe a declara cu nan ta sumamente contento di por tin e conferencia di e comision inter-gubernamental Oceanografico di Unesco (IOC) su region Caribe (IOCARIBE) na Aruba. “E ta di suma importancia pa cu e futuro di nos isla den Caribe,” el a expresa.
Sinembargo, mirando cu ta un tema amplio cu ta concerni tambe na otro ministerionan manera esun di medio ambiente; y tambe na e necesidad di implementacion di leynan di proteccion di lama, tabata notabel e ausencia di mas mandatarionan y parlamentario. E unico dos parlamentario presente tabata Ricardo Croes (RED) y Jennifer Arends-Reyes (AVP). Mester menciona cu e conferencia aki a conta cu presencia di Gobernador di Aruba, S.E. Sr. Alfonso Boekhoudt, kende a wordo ricibi pa Secretaria General di Unesco Aruba, Zetsia Ponson.
Minister Lampe a reacciona bisando cu “nos ta forma un gobierno” y dor di esey nan ta reparti e responsabilidad. Considerando tambe cu e ta minister di enseñansa, ciencia y desaroyo sostenibel y Unesco ta cay bou su cartera. Ta p’esey, den nomber di gobierno di Aruba, minister Lampe a atende e conferencia aki y tambe den nomber di minister di infrastructura y medio ambiente, el a laga sa.
Conferencia
Ta e prome biaha cu Aruba ta sede di un conferencia di e magnitud aki relaciona cu lama y ocean. Esaki ta un refleho –segun minister Lampe- cu nos ta tumando na serio e retonan riba proteccion di e coral y reef, biodiversidad, cambio climatico y acidificacion di ocean cu nos ta enfrentando; specialmente considerando cu Aruba ta biba di turismo. Den su discurso di apertura, minister Lampe a referi cu ora nos ta papia di lama, nos ta papia di bida. Nos futuro generacion –segun e mandatario- ta depende di e proteccion cu nos ta duna na nos ocean tambe.
Otro tema cu a bira un reto den Caribe ta e biodiversidad marino cu tin di haber cu sargassum y otro alganan. P’esey e ta haya como un gran oportunidad pa Aruba cu e conferencia aki ta wordo celebra riba nos isla.
Otro problema tin di haber cu ‘oil spills’ di barconan tankero cu ta haci limpiesa di nan tanki den lama y cu nos a yega di conoce na Aruba. Pa minister Lampe e topico di contaminacion di lama, specialmente dor di industria turistico, petrolero y otro tipo di industria cu tin den nos region, ta un problematica cu tambe nos tin cu pone atencion riba dje. “Oil spills ta un peliger pa nos playanan, y sin e playanan no tin turismo, sin turismo nos no tin economia na Aruba,” el a declara na e matutino aki.
Mirando cu e ta un conferencia cu ta conta cu presencia di experto riba e ciencia di ocean; y considerando cu nos ta un isla cu ta biba di turismo, nos ta depende di lama Caribe. P’esey nos ta satisfecho cu cientificonan rond mundo y di nos region a dicidi bin Aruba. Nacionnan Uni a mira importancia riba e topico aki di cambio climatico y otro situacion cu ta afecta henter mundo. Nan ta bay declara e decada pa ciencia di ocean di 2021 te 2030. Pues e ta kere cu no mester mira e situacion di cambio climatico no solamente como un problema, sino como un oportunidad.
