ORANJESTAD – Minister di enseñansa, Rudy Lampe, a duna su comentario riba e reaccion cu Seppa a divulga di e empleadonan di Bureau Multidisciplinair Centrum (MdC), riba e comparacion cu e mandatario a haci entre e instituto aki y esun di Bonaire (Expertisecentrum) encuanto e prestacion di nan servicio.

Minister Lampe a declara na Bon Dia Aruba cu ta conoci publicamente cu gobierno tin un personeelsstop. Esaki no ta conta pa ministerio di enseñansa so, sino pa tur ministerio. E ta haya cu nos tur mester ta consciente di e limitacion financiero cu nos pais tin, ya cu nos tin cu cumpli cu cierto normanan cu a keda acorda caba cu CAft.

Ademas e no ta kere cu bin cu mas trahado necesariamente lo por resolve e problema di e tempo di espera. El a trece como ehempel e caso di siguridad di nos pais, unda no pasobra tin mas polis riba caya, tin mas siguridad. No necesariamente, sino cu mester por uza mas tecnologia sofistica pa garantisa miho siguridad den un pais. Minister Lampe ta haya cu e logica aki tambe ta conta pa loke ta e sector di cuido.

“No necesariamente mas personal, kiermen bo ta ofrece mas servicio, sino cu bo por uza otro tipo di tecnologia pa haci e trabou mas eficiente. Den e direccion ey nos tin cu pensa,” e mandatario a bisa e matutino aki. Sinembargo e mandatario a aclaria cu considerando e asunto di limitacion di personal, esaki no ta kita cu un organisacion di gobierno por traha riba e parti di productividad laboral. El a bisa cu su ministerio ta dunando atencion na e topico aki.

“Mi tin tur comprension pa e trahadonan di MdC. No ta solamente pa nan, sino pa e maestronan di scol, trahadonan social….” Segun minister Lampe, tur e empleadonan aki ta trece dilanti cu e trabou ta hopi y e retonan tambe. Igualmente cu e problemanan ta grandi y pa tal motibo e tin comprension pa nan preocupacion expresa. Pero e no ta un preocupacion di e empleadonan di MdC so, sino di henter e veld. E ta reconoce cu e trabou a bira mas pisa pa tur e empleadonan aki, pasobra e problemanan a bira mas grandi

E team di MdC cu ta afilia na SEPPA ta dispuesto pa traha hunto cu Minister Lampe pa mas pronto posibel trece un ayudo pa nos muchanan di Aruba. Pa logra esaki ta trece algun opcion padilanti, entre nan: Pa solucion a largo plaso ta referi na mocion number 34 di dia 20 di april 2018, cu a pasa unanimamente den Parlamento di Aruba, pa hustamente fortifica e centro Multidisciplinario den su forma actual, pa asina e por brinda e servicio cu su clientenan merece, cu na su turno tambe ta yuda tur otro mucha, nos educadornan y scolnan grandemente.