Recientemente, Minister di Husticia y Asuntonan Social, ser. Rocco Tjon, a reuni cu Setar, Elmar y KPA, den cuadro di e avancenan pa cu e proyecto di camara di seguridad.
Manera ta conoci, e proyecto aki ta wordo ehecuta den diferente fase, pa cual motibo e ta importante pa reuni periodicamente cu tur e departamentonan envolvi, pa asina por haci palabracionnan concreto, y asina haci miho uzo di tur e capacidad y recurso cu tin disponibel.
Banda di esaki, manera tambe ta conoci, muy pronto e Operation Command Center, cual lo ta situa na Savaneta, lo keda cla den e prome kwartaal di 2024, pa asina mesora instala e ekipo cu ta bay maneha tur e imagennan di e camara di seguridad. Di e forma aki lo asisti Cuerpo Policial y demas departamentonan hudicial den no solamente resolve crimennan cometi, pero tambe preveni y mitiga.
Importante ta pa menciona cu, criminalidad, ta algo cu ta desaroya den diferente forma rond mundo, y sigur no ta algo cu por wordo elimina por completo, y pesey a base di estudionan, informacion, inteligencia y partnerships solido cu demas paisnan, nos lo sigui inverti den tecnologia pa asina preveni y mitiga mas cu ta posibel.
Pues, un reunion sumamente positivo, cu palabracionnan concreto, en espera di e fase final di e proyecto aki, cual un bes mas ta eleva e seguridad pa nos hendenan y bishitantenan.
