Segun Minister Presidente, Evelyn Wever-Croes: ‘Tot nadere orde’ no ta un punto cardinal di discusion actualmente

E decision di gobierno pa corta riba salario di empleadonan publico, semi-publico, empresa estatal y fundacion subsidia pa nan, ‘tot nadere orde,’ ta un palabra na Hulandes cu ta sigui produci preocupacion y dolor cerca e sindicatonan cu ta representa e sector aki.

Nan ta interpreta cu gobierno lo sigui corta sin limite for di nan salario pa atende e efectonan causa pa e crisis di coronavirus/Covid-19 den nos pais.

Minister Presidente, Evelyn Wever-Croes a dedica basta atencion na e palabra aki durante e conferencia di prensa di diabierna anochi. Contestando pregunta di Bon Dia Aruba riba e punto aki, e mandatario a enfatisa cu nos tur mester realisa cu tanten e unico caminda pa nos haya fondo ta Hulanda, no tin espacio pa mucho rekmento of negociacion.

Contrario na e preocupacion di e sindicatonan cu ta representa e trahadonan di e sector publico, nos prome mandatario no ta considera e aspecto di ‘tot nadere orde’ como un punto cardinal. El a bisa cu e palabra aki por tin diferente posibilidad. Gobierno a bisa prome e fecha di 31 di december 2020. Pero el a laga sa cu ta Hulanda esun cu a cambi’e pa ‘tot nadere orde.’ Te ainda a palabra aki cu ta nifica ‘te cu nobo aviso’, no a wordo traduci literalmente na Papiamento durante henter e discusion aki.

Wever-Croes a purba di trece mas trankilidad cerca e sindicatonan di empleadonan publico. “Tot nadere orde por ta hasta prome cu 31 di december 2020.” Igualmente el a bisa cu e por ta despues tambe. Den caso cu si e ta despues, e mandatario a sigura cu tambe lo yega na e mesun conclusion.

El a insisti cu Aruba ta den crisis. E mandatario den su vocabulario a busca e miho palabra cu por pas y mustra e situacion actual di falta di likides di pais Aruba. “Nos ta na suela. Nos ta kibra. No tin placa…” el a bisa. Segun e mandatario, mirando e situacion cu nos ta aden, e ta haya cu esaki no ta momento pa bay den e tipo di discusion aki.

El a recorda cu pais Aruba a haya ayudo financiero den forma di prestamo sin interes tres biaha for di Hulanda. “Bo ta kere cu nos ta contento cu cada luna nos tin cu pidi placa na gobierno di Hulanda. Claro cu no!” el a sigura. Pero actualmente gobierno ta mira cu no ta momento di orguyo, sino cu mester pensa riba e mama y tata di famia cu a keda desemplea y sin entrada pa atende e necesidadnan urgente di nan famia.

Pues e ta haya cu e tres palabra aki: Tot nadere orde, ta crea discusion si ta enbes di 31 di december 2020 ta otro fecha. E ta lamenta e actitud aki, ya cu gobierno ta pensando riba interes general di pais Aruba. “Sorry, pero interes general di pais Aruba no ta wordo sirbi cu e tipo di discusion aki,” el a bisa.

Igualmente el a laga sa cu e ‘tot nadere orde,’ no ta haci excepcion. E ta vigente pa tur hende di e sector publico y tambe pa minister- y parlamentarionan. El a bisa cu gobierno ta bay sigui traha pa cumpli cu e condicionnan pa e proximo trayecto pa logra un fiansa sin interes for di Hulanda. Pero e mandatario a declara claramente cu si gobierno no ta acepta loke nan a acepta diabierna 15 di mei ultimo, ambtenaar no por a cobra diaranson. Aworaki gobierno ta bezig pa empleadonan di e sector publico por cobra otro luna tambe, el a bisa.