Minister Plenipotenciario demisionario mr. Ady Thijsen mediante un comunicado di prensa a remarca cu e proceso di renobacion di e edificio di Gabinete di Minister Plenipotenciario di Aruba na Hulanda ta canando bon, no obstante di un retraso. Esaki segun e mandatario ta debi na rekisitonan necesario den e proceso preparativo pa un proyecto asina grandi.
Sr. Thijsen ta emiti e declaracion aki debi na articulonan den medionan di comunicacion na Aruba, referiendo na su entrevista cu un portal online local. Den e entrevista aki Minister Thijsen unicamente a bisa cu e preparacionnan ta casi cla, cu tin burocracia ta hunga un rol y cu su persona ta desea pa cuminsa cu e renobacion pa asina e edificio lo ta cla na December otro aña pa tene un reapertura na 2026, e aña cu Aruba ta celebra 40 aña di Status Aparte. Segun e mandatario den e entrevista e lugar ta bay keda hopi nechi y ta spera cu tur cos cana bon pa e renobacion tuma lugar.
Minister Thijsen a papia den e entrevista cu e team di Gabinete di Aruba ta haciendo un bon trabao, cu un director nobo na cabes di e organisacion. Tambe Sr. Thijsen a para keto na e contactonan intensivo cu Gabinete di Aruba a bin ta tene cu studiantenan Arubiano, cu segun Minister Thijsen ta e futuro di Aruba.
Finalmente Minister Thijsen ta lamenta cu den e articulonan basa riba e entrevista a hinca hechonan cu no a wordo bisa den e entrevista y alabes cu nan no tin nada di haber cu e proceso di renobacion di Gabinete di Aruba. Asina ta crea un mal concepto di su declaracion riba e tema aki den e entrevista cu e portal online.
E potret ta cortesia di Arubahuis
