Minister Plenipotenciario, Guillfred Besaril a declara na Bon Dia a Aruba cu Arubahuis a cambia su dinamica di traha, menos administrativo y mas operacional. Ademas nan lo bini cu un proceso di reorganisacion den Arubahuis, mirando e era nobo di nos relacion cu Reino Hulandes.

Arubahuis

Minister Besaril a splica cu Arubahuis mester a cambia su dinamica di traha. El a comunica Prome Minister, Evelyn Wever-Croes cu for di 2018, nan a bin preparando pa asina den un laso di cinco aña te 2023, por lo menos 9 di nan 22 personal di Arubahuis no lo sigui traha den e departamento aki na Hulanda. Ya sea cu nan ta baha cu VUT, of nan ta bay cu pension.

Actualmente nan tin 16 persona den nan servicio. Minister Plenipotenciario ta haya cu esaki ta un momento ideal tambe pa atrae personal nobo pa asina Arubahuis tin un team di personal profesional cu por reacciona na e era nobo den Reino cu Aruba ta den dje. Ya cu na luna di november pais Aruba a firma un acuerdo cu Hulanda cu ta duna bida na un entidad nobo cu ta Caribisch Orgaan voor Hervorming en Ontwikkeling (COHO).

Nan mester personal cu experiencia riba tereno huridico, y tambe economico. Pero tambe riba cualkier otro tematica cu ta wordo presenta den e periodo di e proximo 7 aña. E lo bira un proceso di reorganisacion di Arubahuis conforme na e necesidad cu tin na e momento aki.

Segun minister Besaril, e entidad COHO ta cambia e dinamica y rol di Arubahuis. Si antes Arubahuis tabata wordo considera como un embahada, awor e representacion di Aruba na Hulanda ta haya un dinamica adicional, caminda ademas di Arubahuis su rol di embahada, nan tin cu intermedia directamente pa nos pais den nos relacion cu Reino Hulandes. Tur e reorganisacion aki lo tuma luga conforme cu e plan di gobernacion, pero tambe conforme cu e resto cu e pandemia a trece cune.

“Tur esaki ta dinamica cu a cambia e manera di opera. Nan lo bay tin influencia riba e manera di opera di Arubahuis,” segun Minister Plenipotenciario, Guillfred Besaril.

Tratamento medico

Minister Besaril a bisa cu recientemente durante un biahe cu el a haci na Aruba, e tabata hopi contento pa e reaccion positivo di e servicio y atencion cu nan a ricibi for di Arubahuis.

“Ya cu ki ora nan tabata manda mi un mensahe via social media, sigur mi no tabata tarda pa responde y mi tabata tuma accion,” el a declara na e media aki. El a bisa cu nan a purba semper di yuda den cuadro di loke ta nan limitacion tambe.

Loke Arubahuis por observa na Hulanda tin di haci cu e parti di atencion of tratamento medico pa e pashentnan manda for di Aruba. E mandamento di pashent afilia na AZV y cu mester di atencion specialisa na Hulanda a wordo seriamente afecta pa causa di e restriccion y lockdown cu e situacion internacional di Covid a trece cune.

Besaril a bisa cu nos pashentnan tabatin e necesidad di e sosten medico na Hulanda. Esaki a trece cune cu hopi combersacion Arubahuis a hiba cu entidad envolvi riba e tematica aki. Prome cu Covid-19, e pashentnan cu tabata wordo manda pa Hulanda tabata hopi menos compara cu esun cu a wordo manda pa Colombia. Tur cos tabata depende di e cuadro clinico pa e pashent wordo remiti pa Hulanda. Nan tabata haci uzo di un compania pa ricibi e pashent prome cu e pandemia a afecta mundo henter. AZV tabata paga un suma hopi minimo pa e servicio aki, ya cu e demanda di pashent tabata uno limita tambe den comparacion cu Colombia.

Pero ora cu e pandemia a dal henter humanidad e servicio ofreci pa ricibi nos pashent a stop. Esaki a trece cune cu Arubahuis mester haci uzo di nan personal pa bay busca nos hendenan na aeropuerto. Ya cu e compania no tabatin e manera pa cubri tur e hendenan cu a wordo remiti di Aruba pa Hulanda. Pero tambe nan presupuesto hopi limita pa consecuencia di e Covid crisis a haci cu Arubahuis a hunga un rol importante pa guia e pashent pa haya nan tratamento na Hulanda durante tur e lunanan ey.

E asunto aki di asistencia social pa transporta e pashent pa Hulanda a haci cu Arubahuis su tarea fundamental a cambia pa brinda e atencion aki. P’esey el a gradici no solamente ministerio di Salubridad y AZV, sino nan propio personal cu a sacrifica nan tempo, te hasta den oranan y dia special ya sea di madruga of diadomingo of na cualkier dia of ora, pa brinda e servicio social aki.

A pesar di e pandemia nan tabata sali cu tur medida di bio-siguridad y higiena pa ofrece e servicio social aki. Segun minister Besaril, e tabata 9 luna masha dificil for di maart te december di 2020. Ainda e situacion ta persisti, pero e ta menos awor.

Bon Dia Aruba a puntra minister plenipotenciario con e medidanan di austeridad cu gobierno a bin cune pa baha gasto y cu tambe a afecta nan presupuesto -manera e mes a referi na dje- tin su impacto riba e servicio cu Arubahuis ta brinda na e comunidad Arubano na Hulanda?

Minister Besaril a laga sa cu e personal cu Arubahuis tin den nan servicio ta pasando den un periodo cu e ta yam’e ‘peculiar.’ E ta haya cu na dado momento nan mester a reorganisa nan personal pa duna e servicio. Ya cu nan tabatin un Arubahuis cu tabata opera demasiado administrativo ‘atras di un lessenaar.’

Mientras cu tabatin un trabao cu mester a wordo haci mas riba caya. Kiermen e trabao mester a bira mas operacional y mas accesibel. Ya cu ora cu ta trata di comunicacion cu nos conciudadano, esaki mester tuma luga di un forma rapido y efectivo, el a bisa.