Segun Minister Otmar Oduber: ‘Proyecto di incinerador no ta uno PPP’

E destaho publico pa bin cu un incinerador grandi, den cuadro di maneho di desperdicio di sushi, ta habri. Minister di Infrastructura, Otmar Oduber a indica cu e inversion pa desaroya e proyecto aki ta wordo realisa pa e compania priva, ya cu e no ta un proyecto PPP (Private Public Partnership).

“Gobierno di Aruba no ta inverti niun cen pa loke ta trata e planta aki of operacion di e planta aki na Aruba”, el a bisa. Segun e mandatario, ta trata aki di loke nan ta yama Build Own Operate (BOO). E incinerador aki lo ta na encargo di un compania totalmente priva, manera e proyecto di molina di biento na Vader Piet. Segun Oduber, gobierno no lo inverti ni un florin den dje.

Contestando pregunta di Bon Dia Aruba, e mandatario a afirma cu absolutamente e proyecto aki no ta uno PPP. El a bisa si cu Serlimar, pa ley, ta nos compania nacional cu ta atende cu desperdicio di sushi. E ta bira un acuerdo entre Serlimar y e companianan cu ta hiba tur nan sushi.

E compania ta esun cu ta percura pa bin cu e incinerator y instal’e tambe. Igualmente nan ta opera e planta y nan ta bende of cumpra e servicio si ta necesario, pa por produci un ‘negoshi completamente priva’. E compania ta genera su entrada, entre otro, a traves di bende su combustibel na WEB N.V. E mandatario a bisa cu tin un prijs stipula pa locual e compania encarga cu e incinerator lo por bende e produccion di combustibel na WEB.

Oduber a laga sa cu esaki no lo tin su impacto riba aumento di prijs di e servicio di utilidad. Ya cu logicamente, ‘WEB nunca lo cumpr’e na un prijs cu ta sali mas caro di loke ta cost’e pa produci coriente cu fuel oil, manera e ta aworaki’, el a laga sa.

Sino cu e lo bira contrario, ya cu WEB lo purba di ofrece un prijs mas abou. E mandatario a tribi di bisa cu esaki por conduci cu na cierto momento ta stabilisa prijs di awa y coriente na Aruba. Of incluso, baha e prijs di e servicionan basico aki.

E placa uza pa e incinerador chikito pa atende cu e medical base, sludge, carcas, etc. ta parti di e resto di e fondo di FDA (Fondo Desaroyo Aruba), y cu ta bay den operacion na augustus awor.