Durante un conferencia di prensa cu minister Otmar Oduber a ofrece dialuna mainta, el a papia di diferente topico, entre nan e incinerator nobo. El a splica cu mester splica tocante dos incinerator nobo cu gobierno na luna di december a adkiri mediante un destaho.

Na prome luga el a informa di un incinerator cu lo bay atende e sludge, tur loke ta bay den sistema di riolering di pais Aruba cu ta wordo procesa cu anteriormente tabata kima habri den un container y mirando e maneho cu ta core den linea cora pa haci e tipo di procesamento aki den un forma mas amigabel pa e medio ambiente nan a dicidi di bay den direccion mediante fondonan cu nan tabatin di FDA cu nan lo a perde despues di 31 di december.

Tocante e fondonan cu minister a manifesta cu nan a perde, el a bisa cu nan no a wordo uza y pone pa nan pasa den proceso pa loke ta trata e onderhandse aanbesteding cu ocho compania cu tabata envolvi, tres di nan a entrega un oferta y un a retira, dos compania a keda y tabata atende esaki.

Durante e proceso a ser poni varios condicionnan stricto cu e parti aki di e sludge como tambe cadaver y tur e bestianan cu ta wordo haya morto hunto cu e medical waste cu no tabata procesa den un forma adecua, el a expresa cu a ser dicidi di busca un incinerator pa por atende cu tur e tipo di tres desperdicio aki y cu mester ta amigo y protector di e medio ambiente.

Di mesun manera minister Oduber a informa cu e destaho aki a conoce un resultado, el a comenta cu mediante un acuerdo cu Serlimar y DOW cu pa fin di luna ya e ekipo mester ta na Aruba y esey ta nifica cu mas o menos den dos of tres luna e ekipo nobo di incineracion lo bay haci e proceso completamente cera.

E contract cu tabatin cu e compania Johnson Enterprises, desde 2016, a gana mediante un destaho publico na e tempo ey. E destaho tabata cu e mester kima e waste na 100% pa despues por tira na dump pa no haci daño na medio ambiente, sinembargo, minister a splica cu den proceso ora nan a wak mas di cerca y haci testnan riba e procesamento cual a paga 1.3 miyon florin di presupuesto di DOW pa cumpli cu e oferta di seca e sludge completamente, no a ser cumpli.

Esey a resulta cu e contract a ser cancela a base di proyecto di incinerator nobo cu ta bin y esey a implica cu e compania Johnson Enterprises a hiba gobierno corte pa termina contract.

Tambe el a bisa cu den e proceso di testnan di productonan final cu mester ta seco a resulta cu ora e producto ta drenta cu 80% di humedad y mester sali seco, e producto final no tabata seca e sludge ni 5%, esey kiermen cu loke nan tabata paga pa haci no tabata cumpli cune y esey tabata e motibo pakico a termina e contract.