Diamars ultimo tabatin un reunion publico pa asina trata e presupuesto di Tourism Product Enhancement Fund (TPEF) den Parlamento di Aruba, cual a keda aproba cu 17 voto na fabor. Durante e tratamento di e presupuesto Minister di Turismo y Salud, Dangui Oduber, a elabora ariba diferente punto mientras e tabata contesta preguntanan di parlamentarionan.

Durante e reunion Minister Oduber a presenta e presupuesto di TPEF y unda lo aloca e fondonan pa proyectonan di 2024, cual ta inclui proyectonan di diferente categoria, entre otro atraccionnan turistico, seguridad, medio ambiente y cultura.

E presupuesto di TPEF pa 2024 ta un suma di 3.8 miyon florin. El a splica cu prome cu e reforma fiscal e entradanan cu TPEF tabata ricibi tabata bin for di doñonan di timehsare y TPEF tabata ricibi 2% di e entrada aki.

Despues di e reforma fiscal TPEF ta ricibi 2.2% di e “room tax”. E tax aki a wordo aumenta anteriormente, prome cu e reforma fiscal esaki tabata 9.5% y cu e aumento el a bira 12.5%. Di e 12.5% aki TPEF ta ricibi 2.2% cu ta yega na e suma di 3.8 miyon florin.

El a remarca cu den comparacion cu prome cu e reforma fiscal e entrada aki tabata 3.1 miyon florin. Esaki ta nifica un aumento di entrada pa e presupuesto di TPEF di 700 mil florin pa e aña aki.

Parlamento a aproba e presupuesto di 2024 di 3.8 miyon florin cu pais Aruba ta ricibi for di e “room tax” y e presupuesto aki lo wordo reparti den e proyectonan cu ta cay den diferente categorianan cu TPEF ta inverti den dje.

TPEF ta un fondo cu a wordo traha cu e proposito pa inverti den proyectonan cu ta contribui na e mehoracion di e producto turistico di Aruba.

Un di e categorianan cu TPEF ta inverti den dje ta e categoria di cultura y herencia. Minister Oduber a splica cu e ultimo tres añanan nan a pone casi 500 mil florin disponibel pa e aspecto di cultura di Aruba.

E aña aki, el a indica, tin un suma di 150 mil florin presupuesta pa Fundacion Museo Arubano, cual aña pasa tambe a ricibi un contribucion. Apart di esaki tin otro proyectonan den e ramo di cultura cu tin di haber cu TPEF.

E proyectonan cultural cu tin di haber cu TPEF ta inclui inversion den e Ecury Complex, cu ya caba esaki ta e di tres fase. A pone fondonan disponibel tambe pa Museo Arquelogico Nacional Aruba y pa Monumenten Bureau, TPEF ta contribui na Aruba Art Fair tambe.

El a agrega cu recientemente tabatin presentacion pa un proyecto di Stichting Monumentenfonds Aruba pa contribui y participa den e proyecto di Eagle Refinery Historical Tour. El a resalta cu esaki ta un proyecto cu TPEF ta bay financia y pronto ta bay elabora riba dje un poco mas amplio.

Minister Oduber a enfatisa cu turismo tin un balor hopi grandi pa comunidad di Aruba. El a recorda cu durante di pandemia pueblo di Aruba a experiencia kico e tabata ora cu no tabatin ningun turista na Aruba y kico tabata e consecuencianan. “Turismo ta e unico pilar economico y nos tin cu cuida y conserva esaki,” el a subraya.

Algun tempo atras Gobierno di Aruba a anuncia cu ta bay cobra turistanan 35 dollar na entrada di aeropuerto via e plataforma di ED Card pa asina solucion parti di e poblema di RWZI y tambe independisa Directie Luchtvaart.

Ariba e punto aki Minister Oduber a splica cu e procesonan a cuminsa algun tempo atras caba caminda Ministerio di Turismo y Salud, despues di a tene combersacionnan cu Ministerio di Volksgezondheid, Welzijn en Sport, a pensa pa bin cu un fondo di 15 dollar cu mester wordo cobra via plataforma di ED Card.

El a sigui splica cu e suma aki lo mester wordo parti entre gobierno di Aruba, cu ta haya 60%, parti ta bay pa privatisa Directie Luchtvaart y parti ta bay pa un fondo, pandemische paraatsheidsfond, pa garantisa cu tin un fondo disponible pa cualkier eventualidad.

E mandatario a indica cu aworaki e fondo aki ta bay bira un acuerdo cu Hulanda ta trahando riba dje. Segun el a indica, tur pais tin cu bay cumpli cu esaki pa tin un fondo pa garantisa cu tur pais ta miho prepara a cualkier eventualidad.

El a sigui splica cu despues a bin cu e proposicion pa privatisa tambe e departamento di DOW cu ta maneha e planta di Bubali Plas/RWZI. Pa haci esaki mester di entrada pa soluciona e problema y asina a bin cu e pensamento pa agrega 20 dollar riba e 15 dollar aki.

Minister Oduber a indica cu ainda esaki ta den discusion pasobra tin dos forma pa haya entrada aki pa ora RWZI wordo privatisa. Sea ta cobra e 20 dollar via e plataforma di ED Card of ta cobra esaki den un environmental levy, cual tin caba na hotelnan.

El a splica cu ya caba e hotelnan tin e environmental levy implementa, cual ta fondonan cu ta destina pa atende cu problemanan di medio ambiente. E entidad mester scoge entre e dos rutanan aki, sea ta cobra turista prome cu e yega Aruba of ta cobra e turista despues cu e yega Aruba pa asina garantisa cu tin un fondo structural pa soluciona e problema di RWZI.