Siman pasa den Parlamento di Aruba tabatin reunion publico ariba e topico di donacion cu Gobierno di Aruba a haci na Qredits Aruba durante pandemia. Durante e reunion a bin algun punto pa dilanti y Minister di Finanzas y Cultura, cu tambe tabata Minister di Economia e tempo ey, Xiomara Maduro, a tene un conferencia di prensa ayera mainta pa aclaria e puntonan cu ta rondona e topico aki.

Maduro a recorda cu na april 2020 Aruba a cuminsa enfrenta e pandemia di COVID-19. Dia 15 di maart Aruba a cera su fronteranan y cu esaki e economia di Aruba ta perde su entrada principal, cual ta turismo.

Na e momentonan ey, Maduro a remarca, yudansa tabata wordo pidi for di tur caminda y pa e momento ey, segun el a indica, ya caba gobierno tabata trahando hunto cu un ekipo pa wak kico ta e yudansa cu gobierno por brinda, sobre todo na companianan chikito, ya cu 90% di economia di Aruba ta consisti di companianan chikito y mediano

El a splica cu nan a traha pa entre otro por brinda alivio fiscal, pero banda di esaki tambe pa por brinda un alivio special na e companianan chikito y mediano. Aki ta caminda cu e yudansa di cuater mil foirn pa kwartaal a bin aden y a cuminsa dia 29 di april 2020.

Hunto cu esaki, Minister Maduro a agrega, nan a haya un peticion riba 16 di april 2020 cu un peticion di parti di Qredits Aruba na unda cu Qredits aa indica cu nan ta dispuesto pa brinda microcredito special pa companianan chikito durante pandemia.

Segun Maduro a informa, Qredits a indica cu nan lo kier brinda un yudansa den microcredito pa yuda surpasa e pandemia na un interes hopi reduci pa clientenan nobo.

“Gobierno a evalua e peticion aki y a pidi departamento economico pa nan yuda den e parti aki, pero tambe departamento di finanzas pa haci e yudansa aki posibel. Asina a yega na brinda e asistencia aki y a trece tambe dilanti na conocemento publico cu esaki lo tuma luga,” el a remarca.

Minister Maduro a demostra cu documentonan oficial cu dia 1 di juni 2020, a manda un carta hunto cu Minister Presidente di Pais Aruba pa informa Parlamento di Aruba kico ta wordo haci, cual ta e medidanan cu nan ta tuma pa por yuda economia di pais Aruba pa por wanta e pandemia, kico ta bay ta e sosten financiero, cu tabata wordo duna caba y asina por brinda e asistencia.

El a sigui splica cu hunto cu esaki mester tin tambe un trayecto pa formalisa e ayudo aki, pero debi na e situacion di urgencia cu tabatin e tempo ey, a tuma e decision pa brinda e ayudo prome y despues bin back na e parti di formalisa e ayudo, no solamente den presupuesto di aña 2020, pero tambe pa sigui cu e parti di proceso legal.

E mandatario a indica cu den e carta a splica cu lo duna diferente forma di ayudo, entre otro FASE, loonsubsidie, MKB, cu ta e cuater mil florin pa kwartaal, alivio fiscal y tambe e donacion na Qredits.

Manera a menicona caba, siman pasa a tene reunion publico den Parlamento pa asina formalisa debidamente e yudansa di 250 mil florin cu a duna na Qredits. Den e documento oficial cu Minister Maduro a mustra tin dos articulo, un di nan ta e proyecto actual cu Minister Geoffrey Wever ta bezig cune cu Qredits y den e segundo articulo tin e sumanan exacto cu a wordo brinda na Qredits.

El a remarca cu e ayudo cu Gobierno di Aruba a duna Qredits mas di 100 compania chikito a wordo yuda cu un suma total di tres miyon florin pa e companianan aki por a surpasa e pandemia. E yudansa di gobierno ta locual cu a yuda cubri e parti di interes pa asina e companianan aki no a kibra.

“Awo lo bisa kico ta a balor agrega di a yuda? E balor agrega ta, bay back un rato na e tempo di pandemia y pensa con lo tabata si 100 compania chikito lo a kibra? Kico lo a para di e famianan aki? Ken lo mester a yuda e famianan aki? Pasobra na e momento ey nos tur sa cu e tabata un momento hopi duro, cu hasta companianan grandi a sera nan porta, a manda hendenan riba Fase. Nos tur ta corda con esey tabata,” Minister Maduro a recorda.

El a enfatisa cu na momento cu a informa Parlamento di Aruba di locual lo tuma luga, no tabatin reunionnan publico normal tampoco y no por haci un spoedoverleg na e momento ey pa motibo di e situacion cu full e isla tabata aden.

Maduro a agrega cu presupuesto di aña 2020 a wordo aproba unanimamente pa Parlamento di Aruba locual kiermen cu tur fraccion den parlamento, tur parlamentario a bay di acuerdo cu presupuesto 2020 y a bay di acuerdo pa por brinda e ayudo aki, entre otro e ayduo na Qredits.

E minister a menciona tambe cu den e debate publico a bin preguntanan pa dilanti cu tabata insinua cu como minister di finanzas, y tambe economia e tempo ey, a haci cosnan robes.

“Importante di awe ta cu mi ta bin dilanti pasobra mi a mira caba e wega politico kier wordo haci, caminda cu kier tilda mi persona como Minister di Finanzas di a regala placa sin cu esaki a pasa Parlamento. Esaki no ta berdad, mi a mustra e papelnan,” el a señala.

El a indica cu esaki ta demostra cu durante pandemia nan no a perde cabez y cu nan a tuma decisionnan di cual nan a informa Parlamento debidamente y, segun el a sigui splica, nan a percura pa e presupuesto a wordo aproba, cual a wordo aproba unanimamente y aworaki nan a bay na e parti di e formalisacion di e donacion cu a wordo duna na e momento ey.