E argumento cu representante di cluster 4 di Crisis Team, Sra. Glenda Hernandez, a trece dilanti riba falta di infrastructura pa bay full den enseñansa digital, no tin hustificacion. Esaki a base di loke minister di Enseñansa, Ciencia y Desaroyo Sostenibel, Rudy Lampe, a trece dilanti durante un conferencia di prensa ayera mainta.

Sra. Hernandez a bisa cu e hecho cu den actual situacion scol mester cera pa dos siman mas, no kiermen cu “bo ta bay haci enseñansa digital.” El a argumenta cu nos infrastructura no ta prepara ainda pa bin cu un tipo di enseñansa online, ya cu e ta bay tranca infrastructura digital por completo. Esaki ta “djis un mensahe cu mi a tende,” Sra. Hernandez a bisa.

Minister Lampe a declara na Bon Dia Aruba cu e mes a yega di tuma contacto cu Setar, caminda e compania estatal di telecomunicacion a indica cu nan infrastructura ta ‘ready.’ Ademas cu nan a haci inversionnan cu nan capacidad a aumenta 10 biaha mas hopi. “Y cu realmente no tin e peliger cu a keda señala,” segun e mandatario.

Minister Lampe ta kere cu tin un falta di comprondemento entre Setar y e crisis team. E ta spera cu esaki pronto lo keda aclara. E mandatario mes no a acerca Crisis Team pa bin cu un aclaracion a base di loke Setar mes a trece cerca dje, ya cu pa “nos ley nacional nos tin cu respeta e crisis team.”

Derecho y digitalisacion

Di su banda, el a bisa cu e decision di crisis team pa bin cu un cambio di fecha riba apertura di aña escolar ta wordo respeta. Pero como pais Aruba nos ta mara na tratado internacional cu ta para ariba nos ley nacional. Y e tratado riba derecho di mucha ta bisa cu un mucha tin derecho riba educacion, a pesar cu scol ta cera. Ademas e muchanan cu ta creciendo aworaki, practicamente nan no ta conoce otro mundo cu no ta digital. Igualmente e maestronan sa tambe cu digitalisacion mester drenta enseñansa, si nos kier forma nos muchanan di un manera responsabel den mundo di futuro, den cual nan ta bay biba aden. “Anto nan ta bin scol y scol no ta digitalisa,” el a bisa.

E ta haya cu e gap aki mester wordo yena. Mester adapta nos sistema di enseñansa na e mundo di e generacion nobo, ya cu conocemento digital ta necesario, mirando cu nos mundo ta bay den direccion di digitalisacion. Nos tin cu prepara e mucha pa e mundo ey, segun e mandatario.

Rond mundo Unesco -segun minister Lampe- ta conseha tur gobierno cu mester bin cu un modelo di enseñansa a distancia. “Pasobra sino bo ta viola un tratado internacional.” Igualmente el a laga sa cu un Crisis Team ta mara na tratadonan internacional debi cu nos ta obliga como pais pa respeta e derecho riba educacion di nos muchanan.

E ta haya cu nos tin cu duna forma na enseñansa riba distancia. Den cuadro di esaki e mandatario hunto cu drs. Marisol Croes, kende ta directora di recapacitacion di Instituto Pedagogico Arubano (IPA), a anuncia un capacitacion pa maestronan entre 24 di augustus y 1 di september. E minister a bisa cu e dianan aki ta dianan di trabao pa nos maestronan pa hunto cu nan team, e maestronan bin cu nan plan pa concretisa y ehecuta e tipo di enseñansa online.

Ainda ta un incertidumbre kico ta bay pasa riba dia 3 di september cu ta e fecha cu crisis team a menciona pa apertura escolar. Nos no sa si pa e fecha aki nos ta logra baha e curva di casonan positivo. Crisis Team tin cu evalua kico lo pasa despues di 3 di september. Pero e mandatario ta haya cu nos mester ta prepara caba pa niun mucha sali perhudica di e situacion aki.

Minister Lampe a laga sa cu ayera mes, e deliberacion a cuminsa entre otro cu SIMAR pa loke ta preparacion cu SO (Schriftelijk Overhoring.) Tin un proposicion riba mesa considerando e dianan di vakantie cu e maestro tin.

Encuesta

Igualmente minister Lampe a declara cu un encuesta realisa pa departamento di Enseñansa a indica cu 5 di e 45 scolnan a bisa cu nan no tin un plan pa digitalisacion.

Den e caso aki nan ta bay fortifica e 5 scolnan aki riba e parti digital. Pero e hecho cu 40 scol si tin nan plan pa digitalisacion ta bisa hopi riba desaroyo di enseñansa online na Aruba. E ta spera cu den e proximo dianan e plannan di cada scol ta keda concretisa, con nan lo haci pa ofrece educacion na distancia.

 

Pa argumenta su posicion e mandatario a sigui cita e resultado di e encuesta menciona. Durante e periodo anterior, ora cu e coronavirus a yega oficialmente nos isla dia 13 di maart, un 64% di nos scolnan, kiermen mas cu mita, a indica cu nan tin un plan di emergencia ora cu mester interumpi e proceso fisico di enseñansa.

Na juli 2020 e encuesta aki ta mustra cu tin un aumento riba uzo digital, ya cu un 72% tin acceso di internet, compara cu un 62% na maart 2020. Ademas un 75% di e muchanan den e periodo anterior a yega di participa na educacion digital. “Kiermen e sistema di Setar e tempo ey no a crash,” el a bisa

E minister a wordo confronta cu e pregunta cu SIMAR a yega di trece dilanti, cu segun encuesta un 90% di e maestronan no por duna les digital. E mandatario ta kere cu SIMAR ta referi cu un 90% den e prome encuesta haci bao maestronan, nan a indica cu nan kier capacitacion pa loke ta digitalisacion di enseñansa.

“Nan no a bisa cu nan no por!”. Pasobra e ta haya cu ta imposibel cu un 90% di nan, no sa con pa haci uzo di e recurso cu sistema digital ta ofrece. Ya cu nos ta un di e paisnan cu mas halto tin uzo di Facebook cu ta digital. Ademas di otro aplicacion digital y uzo di E-mail. Igualmente el a bisa cu nan ta consciente di e problema aki, y esey ta e motibo cu IPA ta bin cu un plan pa capacita nos maestronan.

Encuanto e examen cu lo tuma luga na luna di october awor, e mandatario a bisa cu nan tin e obligacion pa zorg pa e SO nan tuma luga, pa no perhudica niun mucha. El a bisa cu lands examen pa otro siman lo keda anuncia, unda tur esunnan interesa por inscribi y nan ta haya tur cos online pa prepara nan mes pa MAVO, HAVO y VWO. E plan di digitalisacion di lands examen lo continua, el a bisa.

A pesar di e discrepancia entre minister di Enseñansa y Crisis Team riba implementacion di enseñansa online, e mandatario no ta haya cu ta existi un contradiccion.