Reaccionando riba e polemica riba maneho nobo di e mandatario encarga cu enseñansa, el a aclaria cu entrante aña escolar 2019-2020 docentenan di scolnan secundario y cierto scolnan post secundario no lo tin mag di traha mas cu 8 ora di overtime pa luna. E maneho aki, cual ta existi caba, no lo conta pa scolnan preparatorio of primario.

Minister Rudy Lampe (RED) a splica cu gobierno a bin cu un sistema di reporte di mita di aña (halfjaarlijks rapportage) unda cada 6 luna lo mester reporta con ta para cu e ehecucion di e presupuesto aproba y cuanto e gastonan y entrada ta encera. Esaki pa evita surpasa e suma pa subsidio di salario cu ta presupuesta.

Di mesun manera, Minister Lampe a aclara cu e presupuesto di enseñansa den gran parti ta bay pa salario y e 13% cu ta sobra ta pa paga huur di edificionan di Departamento di Enseñansa, loke ta nifica cu no tin espacio pa carga gastonan cu no ta presupuesta.

El a sigura cu si e situacion sigui, lo bay surpasa e suma di subsidio di salario cu ta presupuesta pa 2019 y pa via di esey, nan a manda un carta pa e directiva di scolnan pa pone tur hende alerta, esey a genera un discusion interno entre directora di Directie Onderwijs cu directivanan di scol tocante e pago di overtime cu ta premira den aña escolar nobo. E mandatario a expresa cu e situacion a bira tal cu ta haci e problema publico pa via di un interpretacion robes.

Prohibicion di overtime excesivo solamente pa scol (post-) secundario
E maneho nobo lo bay conta pa scolnan secundario y cierto scolnan of institutonan post secundario, pero no pa scol preparatorio of scol primario. Un maestro cu tin un trabou full-time (volledige betrekking) ta traha 32/27 ora cu ta inclui oranan den les y oranan di preparacion, loke ta suma igual na 40 ora di trabou pa siman. Un lesuur ta inclui e ora di les, e preparacion y evaluacion di e les, p’esey un lesuur ta mas cu un klokuur, y un taakuur ta 75 minuut.

Minister Lampe a comenta cu pa hopi tempo caba e regla aki ta existi pero cu nunca nan a skirbi esaki. Directivanan di scol, segun e mandatario ya caba ta conta cu e cantidad maximo di lesuren ta 36. Mientras cu ora tin escasez di maestro pa cierto materia un maestro por haya extra oranan of overuren riba nan 32 lesuur te un maximo di 40 ora. Kier men, e ministerio a haci un ‘ongeschreven beleid’ skirbi.

Den su carta, cual SIMAR a conta portal Noticiacla.com cu e ta ‘mal skirbi’, e mandatario ta informa directiva di enseñansa y scolnan publico cu overtime excesivo no lo ta tolera mas. Ademas e mandatario a splica, algo cu no ta para den e carta, cu docentenan cu ta duna les den parti mainta y tambe den parti anochi no lo por conta nan oranan den parti anochi como ‘overtime’. Esaki en bes lo keda conta como oranan los (losse uren). Apart di esaki no lo bay cubri oranan di AO mas, ni dianan di vakantie cu no keda uza pa via di AO.