Mandatario Rudy Lampe a mustra e cifranan di gasto di biahe cu el a realisa den su condicion di Minister. E rapport aki, cu ta data for di december 2017 te cu juli 2019, ta trece e cifra total di Minister Lampe su biahenan cu a suma un tiki mas cu 12 mil florin.
Varios di e biahe cu el a realisa, ta invitacion cu el a haya como academico, y no como Minister, el a splica. “Tur cos a wordo paga dor di universidad cu ta invita mi,” el a bisa. Igualmente el a agrega cu pa loke ta biahe oficial, nan ta purba di ta mas den austeridad posibel.
Segun e mandatario, como Minister di Enseñansa, e ta haya hopi invitacion mes. E luna aki e tin un invitacion pa bay Mexico pa atende un conferencia internacional. Su intencion ta pa e otro aña nan lo por trece e conferencia aki Aruba. Tambe ta e caso di Minister su biahe pa Paris prome cu fin di aña, pa atende un reunion di Unesco, unda como mandatario, e mester ta presente.
Si e ta acepta tur invitacion, cada luna e mester ta biahando pa atende nan tur, asina el a bisa. Den e caso aki, e ta purba deliberadamente di scoge cual ta esunnan mas importante pa bay. Tin otro invitacion cu un ambtenaar –segun e mandatario- por atende pa pais Aruba.
Minister Lampe a dicidi di bin cu e dato aki, despues cu partido di oposicion ta publica cu el a gasta 600 mil florin den biahenan, durante e periodo cu e ta forma parti di e gabinete actual.
El a reclama cu e 12 mil florin cu el a gasta oficialmente, como minister den un aña y ocho luna, ta loke ex Prome Minister di e gabinete anterior por a gasta mas den un solo biahe. El a sentencia cu loke e partido di oposicion a divulga ta un mentira fragante pa desacredita un gobierno cu ‘si ta traha cu respet pa placa di pueblo.’
