Minister Glenbert Croes a reuni cu gremionan comercial referente e escasez di trahado pa por cumpli cu e demanda laboral. Segun un comunicado di prensa, mientras tanto, su bureau como tambe DPL y DAO ta den constante deliberacion cu gremionan con mihor atende e preocupacion aki y acapara e escasez pa por cumpli cu e demanda di trahado.
Manera ya ta conoci, e aña aki lo tin 3000 camber di hotel adicional ta habri. Segun indicacion inicial, lo ta bay tin mester di por lo menos 9000 trahado pa e hotelnan aki por opera y duna e servicio optimal cu nan ta desea.
Segun e comunicado, maneho di e minister ta cu yiunan di tera ta prome pa haya trabao. Esaki a keda demostra den e cifra di desempleo di mas abao cu Aruba a yega di conoce bao maneho di e mandatario: 4.3% na 2022. E LFS esta Labor Force Survey a wordo ehecuta pa Censo, Centraal Bureau Statistiek CBS, Banco Central Aruba CBA y Departamento di Labor & Investigacion DAO. Dentro di poco lo anuncia e tasa di desempleo pa 2023.
“Yiunan di tera na prome luga ta keda e punto di salida di e mandatario. Y mescos cu Minister Croes tin oido pa e gritonan di gremionan comercial, igual e mandatario tin oido pa e gritonan den nos comunidad di hendenan di edad 45+ cu no ta hayando trabao,” segun e comunicado. “Tin pensionadonan cu a acerca Minister Croes expresando nan deseo di por sigui traha. Pa esaki e titular di Labor a acerca Minister President di Aruba pa sondea si ta posibel duna un incentivo fiscal pa e pensionadonan cu kier sigui aporta na desaroyo di nos pais.”
Den e comunicado, Minister Glenbert Croes a anuncia cu pronto lo bay organisa un Jobfair specialmente pa e categoria di edad aki unda tur comerciante y gremionan, hunto cu departamentonan di Labor esta DAO y DPL lo ta presente pa asisti y intermedia unda ta necesario.
Cu e incentivo aki Gobierno di Aruba, lo yuda yena e demanda laboral cumpliendo cu e preocupacion di gremionan y na mes momento duna nos adultonan + mayor, e oportunidad pa por sigui brinda nan mes un miho calidad di bida aportando na e desaroyo continuo cu nos pais ta conociendo.
