Segun minister Glenbert Croes: Falta di acuerdo cu Hulanda no tin impacto den FASE

E ultimo update duna pa Directie Financien ta mustra cu for di april te cu september un suma total di 31.261.898 florin a wordo paga na un total di 11.225 persona for di Fondo di Asistencia Social y Emergencia (FASE). Mientras cu Conseho di Minister a dicidi di honra e peticion di Parlamento pa extende e ayudo aki cu tres luna mas, te cu fin di december 2020.

Bon Dia Aruba a puntra Minister di Asunto Social y Labor, Glenbert Croes, cual ta e suma asigna pa paga e proximo tres luna y pa cuanto hende e por yega? E mandatario no a trece dilanti niun cifra specifico, pero si el a laga sa cu esaki ta depende di e cantidad di hende cu a cualifica. “Nos como gobierno a compromete cu si ta e mesun cantidad di september ta cualifica, nos ta paga e suma corespondiente,” el a contesta. El a trece como ehempel cu na juni, 5.688 persona a aplica. Como gobierno nan a compromete pa cumpli cu e cantidad di hende aki, y e biaha ey nan a paga 5.503.698 florin.

E mandatario a bisa cautelosamente cu pais Aruba tin problema dilanti pa bay atende, ya cu ainda nos no a sali di e problema actual. Pues nan ta premirando problema grandi na caminda, por locual nan como gobierno ta bay sigui yuda nos comunidad di diferente forma y den cualkier circunstancia. Instancia internacional ta pronostica cu lo tarda un aña te hasta dos aña prome cu tur pais ta para ariba pia bek.

“Na Aruba nos ta cautelosamente optimista cu nos por alcansa, prome cu tur expectativa, e tempo bon bek,” el a bisa. Pero mientras tanto, nan mester pa trahadonan y tur hende por sali dilanti for di e crisis cu e pandemia aki a trece pa Aruba y henter mundo. Pues e ta bay ta un reto… e no ta bay ta facil,” el a indica.

FASE y acuerdo cu Hulanda

Na juni nos tabatin ainda e facilidad di e ayudo financiero preferencial di Hulanda pa atende nos necesidad di likides financiero. Na augustus y september no tabata e mesun situacion. Pero te ainda gobierno no a yega na un acuerdo cu Hulanda pa sigui haya e ayudo (prestamo) aki, mientras cu e necesidad di comunidad ta sigui crece keto bay. Sinembargo e mandatario a laga sa cu e ayudo di FASE no ta mara na e facilidad di placa cu Hulanda a yega di otorga na pais Aruba. Mientras cu henter e maneho di finanzas ta dirigi – segun e mandatario – di tal forma pa gobierno por duna asistencia social y subsidio di salario. “Cu nos ta considera fundamental pa Aruba sobrevivi,” el a bisa.

Encuanto cu no tin un solucion structural pa gobierno por sigui cumpli pa atende e necesidad aki, ya cu ainda no a yega na acuerdo cu Hulanda, minister Croes no por pronostica si e situacion actual ta bay cambia. E ta haya cu e deliberacionnan cu ta tumando luga cu instancia internacional financiero y tambe cu gobierno di Hulanda, hunto cu esfuerso di e plan di recuperacion economico y turistico, e ta kere cu nan lo por deal cu e necesidad social y laboral urgente.

Pero e compromiso haci pa cumpli cu FASE y subsidio di salario te fin di december ta algo cu gobierno a compromete di cumpli cune. Nan expectativa ta – segun minister Croes – den e proximo tres luna y kisas mas pronto cu tardi, ta cu pais Aruba lo yega na e acuerdo aki cu Hulanda, pa sigura e ayudo den un forma structural.

Pero no mester lubida tambe tur loke a wordo logra bao nos propio esfuerso, el a bisa. El a trece dilanti cu subsidio di salario inicialmente a wordo haci cu yudansa financiero di Hulanda. Mientras cu FASE a wordo haci cu sacrificio di trahadonan di gobierno, kiermen solidaridad di nos propio hende.

P’esey el a reitera cu como gobierno nan ta ‘cautelosamente optimista’ cu e negociacion cu Hulanda lo mester yega na un resolucion positivo pa Aruba y Hulanda. “Obviamente esey ta den man di nos minister presidente y nos minister di Finanzas y Economia,” el a expresa.

Menos hende den FASE

Na luna di april ultimo, 10.715 persona a wordo beneficia cu e ayudo di FASE cu a nifica un suma di 10.189.958 florin. E cifra aki a wordo produci, apenas e crisis a cuminsa cu e dos prome casonan di Covid-19, registra oficialmente dia 13 di maart ultimo.

Pero keto bay e cantidad a cuminsa baha cada luna y na september 2.704 persona a ricibi ayudo di FASE pa un suma total di 2.532.768. Kiermen den 5 luna e cantidad di hende cu a yega di ricibi FASE inicialmente, a baha cu 8 mil. Cual ta e motibo di esaki? Ya cu nos economia no a reactiva ainda y cada dia nos por tende cu lamentablemente mas cupo di trabao ta bay perdi, compara cu 6 luna prome?

Minister di Asunto Social y Labor, Glenbert Croes a declara na Bon Dia Aruba cu na april, ora cu nan a bin cu FASE, no tabatin ainda subsidio di salario.

El a referi cu subsidio di salario a cuminsa na mei. Den e luna ey, hopi hende cu a haya FASE na luna di april, a bay di FASE pa subsidio di salario. Esaki a marca e diferencia cu aworaki nos tin menos hende den FASE compara cu e inicio di e programa di ayudo aki.

Minister Croes a indica cu na luna di september, mientras 2.704 persona a haya ayudo di FASE, di otro banda, 20.865 hende a haya subsidio di salario. Mientras cu tambe tin casi 2.945 hende ta hayando un sorto di bijstad for di departamento di Asunto Social. E ta haya cu e cifra aki ta mas hopi cu e cifra di 10.715 persona cu inicialmente a ricibi ayudo di FASE so.

FASE y asistencia financiero

Riba e cifra cu departamento di Finanzas a trece dilanti relaciona cu e ayudo di FASE, ta riparabel cu luna di augustus y september a wordo registra e dos cifranan mas abao cu a wordo duna di FASE.

E ta coincidi por cierto cu e di tres tranche di Hulanda cu no a drenta den caha di gobierno, debi na e proceso di negociacion cu ainda ta tumando luga riba e condicionnan cu Hulanda a bin cune pa sigui otorga prestamo faborabel na pais Aruba. Ta existi un conexion cu otro, mirando e situacion di falta di likides cu tin aworaki?

E mandatario aki a haya cu esaki ta un bon punto pa trece claridad riba dje. El a splica cu na augustus nan a pone cu mester aplica pa FASE. El agrega cu full e proyecto di FASE a cuminsa debidamente cu un investigacion cu a conta cu nan cooperacion tanto di Centrale Accountant Dienst y Contraloria General (ARA), riba dicon ta atende cu FASE.

Te hasta un dado momento a wordo señala cu nan mester un forma pa nan por midi si realmente esnan cu ta haya FASE originalmente, ta esun cu berdaderamente mester di dje. Ya cu FASE ta pa un hende cu realmente no tin otro entrada. P’esey nan a bin cu exigencia. Prome cu 15 di augustus e persona mester aplica pa e prolongacion, y esey ta e motibo cu eventualmente a haci cu e cantidad a baha tambe.

Ora cu nan a bin cu e prolongacion, prome cu 15 di augustus, esnan cu a prolonga na tempo prome cu e fecha stipula, a haya FASE. Y awor e cantidad na september a baha mas tambe, el a bisa. El a agrega cu na september den e cifra di 2.704 persona, ainda falta casi 600 hende cu ta comerciante independiente (ZZP). El a bisa cu un consideracion cu nan como gobierno a tuma ta cu denter e ultimo 3 lunanan aki te fin di aña 2020, e pago di FASE y ZZP ta bay ta mesun cos, 950 florin.

E ta premira cu unabes cu e tres luna prolonga di FASE lo yega su fin na december awor, e programa nobo di “Aruba Kier Traha” lo continua. Pero tambe pa medio di un subsidio di salario transforma, pero tambe cu sosten di bijstad cu ta e politica di asistencia social di gobierno.