Nombramento di familiar y amigonan pa traha sea na ministerio of departamentonan di gobierno ta conoci for di basta tempo caba y ta sigui tuma luga specialmente den seno di partido MEP.
Pa cu esaki, Bon Dia Aruba a acerca e dos ministernan nobo di partido Raiz si esaki tambe ta bay tuma luga den nan ministerio na momento di nombra nan ekipo di trabao den nan despacho.
Aki Geoffrey Wever a contesta cu desde cu e tabata campaña el a bisa cu mester traha mas cu hende den aparato publico cu tin experiencia y tambe pa di e forma ey no aumenta gasto den aparato.
E minister di Asuntonan Economico, Comunicacion y Desaroyo Sostenibel cu a keda nombra recientemente den Gabinete Wever-Croes II tambe a anuncia cu e tin 9 persona so den su bureau di cual 7 ta ambtenaar.
“2 hende so mi a pidi di sector priva, mi chief of staff y un hurista cu ambos ta hende di mi confiansa”, Wever a sigura.
Asina tambe el a indica cu el a campaña pa no aumenta gasto den aparato publico y el a percura pa compone su bureau di e forma ey, ademas el a informa cu e 7 personanan aki no tin relacion cune, tin algun di nan cu a solicita y otro cu el a acerca nan.
Di loke ta trata vice prome minister y di Integridad, Naturalesa, Transporte y Cuido di Grandinan, sr. Ursell Arends, te ainda Bon Dia Aruba no a haya un contesta oficial di su persona riba e mesun pregunta haci na su colega di partido.
