Ayera mainta durante un conferencia di prensa di minister di Economia, Comunicacion y Desaroyo Sostenibel Geoffrey Wever, el a anuncia e ahustacion di prijs di gasolin y diesel cu for di mañan 4 di september lo conoce un disminucion di 25.2 cen pa cada liter.
Cu esaki e prijs di gasolin ta bay keda na 2,68 florin pa liter loke ta representa un reduccion di 8.6% compara cu e prijs di luna anterior.
Pa loke ta e prijs di diesel, e lo baha cu 8.5 cen unda e prijs ta bay keda na 2.70 florin pa cada liter, un reduccion di 3.1% compara cu e luna anterior.Nos ta contento di wak e desaroyo aki, dialuna pasa e prijs a reduci y e tendencia tabata cu e prijs lo sigui reduci y nos ta wak awe cu e promedio di luna di augustus tin un reduccion atrobe y e ta bay ta dia 14 di september”, minister Wever a sigura.
Manera a keda conoci, esaki ta pa motibo di desaroyo internacional unda cu gobierno ta establece e prijs e ora y nos ta contento pa wak cu e prijs ta bahando, tambe nos ta espera cu e tendencia aki continua, sinembargo, esey no ta den man den gobierno na e momento aki”, el bisa.
Pa loke ta trata e fluctuacion den prijs di combustibelnan y e fleta, minister Wever a expresa cu e formula cu gobierno ta aplica y paisnan rond di mundo ta cu tin cu paga basa riba e Cost, Insurance and Freight (CIF) y esey ta nifica cu si e prijs di fleta ta subi of baha tambe tin un impacto riba e basis cu lo cual ta calcula e accijns y impuesto.
Tur cos cu tin di haber cu produccion cu supply chain tambe ta relata na prijs di petroleo internacional, esey ta nifica cu si esey baha, tambe lo tin impacto riba e gastonan di e compania cu ta transporta y nan prijs di transporte tambe ta supone di baha, e ora ey tin menos gasto. Pero ora e fleta ta subi e prijs tambe ta subi, manera por a mira esey den e ultimo 18 luna di un manera hopi fuerte, “ora cu e prijs ey ta baha di un di e productonan basico cu mester pa produci bo producto, e por refleha den e prijs di e producto mes y esey ta e sistematica di mercado liber caminda competencia ta trece ahustacion den prijs”.
Den caso cu lo pone cu e prijs internacional baha of subi, esey tin un impacto tambe individual riba e prijs ora ta fluctua, segun minister a expresa. Pa e motibo ey, minister Wever ta considera cu mester tin bon competencia riba mercado pa asina competidonan por ahusta nan margennan y esey ta ora tin un mercado cu ta funciona bon. “Ggobierno fuera di e productonan cu ta den canasta basico of hasta prijs di gasolin caminda cu gobierno a bisa kico e porcentahe maximo ta cu un comerciante por cobra riba cada liter cu e ta bende, ta conta tambe pa e productonan cu ta den e canasta basico cu gobierno ta stipula kico ta e porcentahe maximo cu nan por cobra, eynan si tin un poco espacio pa gobierno interveni pero den principio, e comerciante ta determina su prijs”, el a indica.
Den relacion cu e reunion cu a tuma luga cu comerciantenan Chines, minister Wever a bisa cu nan a sigura di bay sondea den nan seno pa wak ki espacio tin “pero nos tin cu corda cu e fluctuacion aki ta tarda pa nan haya efectonan den e prijs, asombra productonan cu ta wordo cumpra awe a wordo traha caba y e impacto no ta directo”, minister Wever a señala.
Di mesun manera, el a informa cu nan ta monitor e prijsnan continuamente, specialmente e cifranan di inflacion “nos ta wak e cantidad cu ta wordo importa, nos ta monitor esaki manera mi a menciona caba, esaki ta desaroyonan internacional den cual Aruba como un pais chikito, no tin influencia riba dje”.
Ademas, el a bisa cu ta bay biaha den exterior unda cu Minister di Salud Dangui Oduber y su persona a wordo invita pa acompaña e pareha real y delegacion di Hulanda unda cu representantenan di Gobierno di Corsou tambe ta participa den biahe aki. “Mi ta kere e ta un oportunidad pa Aruba yega den contacto mas directo cu por ehempel, diferente companianan importante, e delegacion Hulandes a set up full un agenda caminda cu ta bay tin encuentronan cu diferente universidadnan, eventonan cu companianan grandi y CEO di companianan di San Francisco, California y Texas cu lo bini na diferente evento, cu topiconan interesante riba agenda cu un schedule hopi intensivo y cu por ta un oportunidad pa habri wowo na comunidad internacional cu Aruba tin oportunidad y kier ricibi inversionnan nobo”, minister Wever a señala.
Igualmente, el a indica cu esaki ta un plataforma unda lo expone Aruba y nan ta haciendo nan mesun intento tambe unda nan lo anuncia proximamente un investment summit caminda lo pone Aruba riba mapa internacional pa inversionistanan, di esaki, el a sigura cu ta bay tuma na principio di luna di november.
