Cu e fin di stimula y pone diferente partner pa Plan Oranjestad cuminsa su prome fase, diamars ultimo Minister di Asuntonan Economico, Comunicacion y Desaroyo Sostenibel Geoffrey Wever a splica cu e plan aki a wordo exponi na Parlamento di Aruba durante tratamento di presupuesto.
Minister Wever a trece dilanti cu nan a pone den ministerio diferente elemento pa motibo cu e ta considera cu Oranjestad mester flow di hende y clientela, un di e formanan pa haci esaki ta door di trece tur e departamentonan back hunto den centro di e ciudad caminda pa crea clientela pa hende cu tin un restaurant, bar of coffe shop por wordo yuda.
“E parti ey di Oranjestad ta den full ehecucion y nos ta bezig trahando cu rekisitonan di programa di diferente departamento y wak e necesidadnan cu nan tin y edificionan cu ta bezig aworaki pa wak cua dienst por wordo ubica den edificionan aki”, minister Wever a señala.
Esaki ta un parti di trabounan cu ta bin haciendo pa cu e plan aki y tambe ta trahando riba un maneho nobo pa centro di Oranjestad pa establece negoshinan na un forma mas facil y mas acelera, el a sigura cu tin hopi interes caba pa full sector priva cu ta acercando na nan pa establece nan mes door cu nan sa cu ta bin un maneho nobo mas flexibel, ademas el a declara cu nan tambe ta trahando riba incentivonan fiscal pa esnan cu tin intencion pa bin centro di ciudad tambe lo wordo stimula pa inverti den area aki.
“Nos ta papiando cu tur stakeholders den centro di ciudad caba, doñonan di edificionan, comerciantenan grandi y chikito pa purba yuda nan cu nan ideanan pa yega na un entendimento si loke nan kier logra ta den vision di gobierno pa hunto ehecuta esey, mi ta calcula den algun siman nos por presenta e prome fase di e Plan di Oranjestad”, minister Wever a expresa.
Aunke tambe el a comenta cu situacion financiero di Aruba no ta den su miho momento manera comunidad ta conoce pa por inverti grandi den areanan di infrastructura nan mester ta creativo, minister Wever ta kere cu awor den preparacion ta bon un fase 1 pa desaroyo di Oranjestad den e cuadro financiero cu nan tin.
