Ayera mainta, Minister di Enseñansa y Deporte, Endy Croes a tene un conferencia di prensa y durante e ronda di pregunta di miembronan di prensa, e minister a toca e tema di scarsedad di docente na Aruba.
Contestando un pregunta di e un miembro di prensa ariba e problema di scarsedad di docente na Aruba, minister Croes a indica cu na Hulanda tambe tin scarsedad di docente y cu recientemente tabatin un actualisacion ariba esaki y cu falta nuebe mil docente.
“Na Hulanda esaki ta algo cu no ta desconoci y nos cu ta mucho mas chikito den cierto area nos falta y tin cierto area cu hasta tin di mas,” Minister Croes a remarca.
E mandatario a splica cu loke nan cuminsa traha riba dje ta riba e acuerdo cu a firma durante e vierlandenoverleg. El a sigui splica cu nan cuminsa caba riba e proyecto di Kibrahacha, cual ta un proyecto di samenopleiding di docentenan pa henter Reino.
“E proyecto aki ya ta andando caba. Esaki ta un inicio y den un otro forma nos ta prepara docentenan cu por traha facilmente na Aruba, facilmente na Sint Maarten, facilmente na Corsou, Boneiro y hasta Hulanda. Esey ta un inicio di e proyecto cu ya caba a cuminsa pa mitiga e problematica aki,” minister Croes a subraya.
Otro punto cu el a menciona ta cu mester keda inspira tambe e propio hendenan di Aruba pa scoge pa e rumbo di enseñansa, y el a señala cu cada aña menos hende ta scoge pa e rumbo di educacion.
Por ultimo el a agrega cu pa algun luna caba tin un comision cu ta trahando riba esaki, y hasta riba e parti salarial di e docentenan, pa por haci e opcion pa bira docente kizas mas atractivo pa e propio hendenan local por uni y prepara nan mes como educador.
