Segun Minister Endy Croes: Cantidad di studiante cu ta bin back Aruba for di Hulanda ta tiki

Ayera mainta durante conferencia di prensa di Gobierno di Aruba, Minister di Enseñansa y Deporte, Endy Croes a elabora ariba su biahe pa Canada y Merca, na unda a firma MoU cu diferente universidad na beneficio di studiantenan di Aruba cu lo kier bay studia na e paisnan aki.

Minister Croes a splica cu na Toronto, Canada nan a bishita diferente scol na unda ya caba tabatin pre negociacionnan andando y caminda a logra firma diferente MoU pa brinda un miho prijs y miho oportunidad na e studiantenan cu ta desea di studia na Canada of Merca.

E prome scol cu e minister y su delegacion a bishita tabata e Centennial Art & Technology College unda cu nan a reuni cu e director internacional. El a indica cu Aruba tabatin caba, un tempo, un MoU cu Centennial College y cu e MoU aki e studiantenan tabata ricibi dos mil dollar di descuento como beca pa aña.

Aworaki a firma un MoU y a logra aumenta e suma aki na tres mil dollar y e MoU nobo tin un validez di tres aña.

Minister Croes a bishita tambe Sheridan College caminda a logra firma un contract nobo. El remarca cu nunca antes pais Aruba tabatin un relacion cu e scol aki y aworaki loke tin riba mesa ta descuentonan di entre 500 te cu dos mil dollar pa aña pa studiante.

A firma un MoU cu duracion di cinco aña y el a splica cu seis luna prome cu e MoU vence lo percura pa revisa esaki, evalua cuanto studiante a haci uso di esaki, kico ta e interes di parti di studiantenan di Aruba y asina habri mas porta pa stimula e studiantenan pa keda studia.

Despues e delegacion a bishita Ontario Tech University. Otro universidad cu prome biaha Aruba ta firma un acuerdo cune. Minister a subraya cu esaki ta un universidad cu standard hopi halto pa loke ta techonologia y ingenieria y ademas a combersa tocante realisa programa di intercambio cu Universidad di Aruba.

Seneca College tambe a ricibi bishita di Minister Croes y su delegacion. Seneca ta un scol cu ya caba ta popular entre studiantenan Arubiano. Segun el a indica for di 2013 Aruba tin contract cu universidad, pero lamentablemente aña pasa na momento cu esaki a caba, nan a cambia nan maneho pa studiantenan internacional y como cu Aruba tabata haya un descuento excepcional, nan no por haci un excepcion pa Aruba so y aworaki e universidad ta revisando un sistema diferente cu lo por hiba na firmamento di un acuerdo nobo.

Ademas di e bishitanan na e diferente universidad, Minister Croes a tene un reunion virtual cu e consul di Reino Hulandes na Canada y a pidi pa yuda cu e lobby pa Aruba por subi e lista di ILAC Scholarship, cual ta e lista di scolnan internacional cu por ricibi scholarship local pa studia na Canada.

El a resalta cu den caso cu Aruba logra subi e lista di ILAC, na universidadnan cu a firma MoU caba, studiantenan di Aruba lo ricibi un descuento adicional.

Pa loke ta desafio cu e studiantenan ta enfrenta, Minister Croes a splica cu algun desafio cu tin ainda pa studiantenan di Aruba por bay studia na Canada ta entre otro e biometrics test cu ta necesario y ta parti di e proceso rekeri pa por ricibi visa di studiante pa e pais aki y tambe e suma di 10 mil dollar cu studiantenan mester tin pa por bay studia na Merca of Canada pa nan por ricibi nan visa como studiante. El a sigui splica cu e studiante mester presenta un cuenta di banco na unda ta demostra cu tin e suma di minimo 10 mil dollar pa asina por ricibi e visa pa bay studia na e paisnan aki.

Na Merca a logra regla esaki cu un carta di Arubalening cu ta bisa cu e studiantenan ta ricibi Arubaleining pa cierto suma y esaki ta facilita e proceso pa e studiante.

Den caso di Canada, e minister a agrega, no a yega asina leu ainda y pa e motibo ey Minister Croes a pidi e consul di Reino Hulandes na Canada pa yuda intermedia ariba nivel di gobierno pa den futuro, inmigracion Canades por acepta e carta di Arubalening pa facilita e proceso di visa pa Canada tambe.

Despues di bishita na Canada, e delegacion a sigui pa Florida na unda tabatin dos bishita programa. Prome a bishita e University of South Florida.

El a indica cu na e scol aki Aruba tambe a subi e lista di LAC Scholarship y esaki kiermen cu Aruba ta wordo reconoci pa ley ariba e lista aki na e estado di Florida.

Minister Croes a sigui splica cu na momento cu un studiante aplica pa studia na University of South Florida, e por aplica pa e LAC scholarship y si e cumpli cu tur e rekisitonan di admision di e universidad mes, e lo ricibi su admision cu e LAC scholarship.

El a enfatisa cu e LAC scholarship studiantenan di Aruba no ta paga mas e suma di un studiante internacional, cu ta entre 18mil y 19 mil dollar pa aña, pero ta paga suma di studiante local, cu ta alrededor di seis mil dollar pa aña.

“Cu e Arubalening e ta haalbaar cu bo por bay un tipo di scolnan grandisimo y cerca di cas y economico, esey ta locual cu nos ta busca,” Minister Croes a resalta.

E delegacion a bishita tambe e Florida Institute of Technology, un scol priva y cu cual Aruba a firma MoU. Minister Croes a indica cu a pesar cu a firma un MoU, e suma di descuento cu studiantenan di Aruba cu kier bay e scol aki lo ricibi no a ser determina na momento di firma pasobra e directiva di e scol mester tuma e decision.

El a agrega cu diamars nan a ricibi noticia for di Florida Institute of Technology y e universidad tuma e decision cu ta bay brinda cada studiante di Aruba cu realisa nan estudio di cuater aña na e universidad un beca di 25 mil dollar pa aña.

Durante e ronda di pregunta, Minister Croes a splica den su contesta na un miembro di prensa cu e motibo pakico nan ta stimulando y ta expandiendo mas oportunidad pa studiantenan bay Merca of Canada ta pa motibo cu aunke cu Aruba ta custuma cu e sistema Hulandes, e ta accesible hopi mas facil, no mester visa pa bay y pues e obstaculonan ta menos, nan a nota cu e cantidad di studiantenan cu ta regresa Aruba cu nan conocemento pa bin traha na Aruba y yuda Aruba desaroya, ta hopi tiki.

Pa e motibo ey e vision ta Toronto of Merca. Den caso di Merca, ora cu un studiante bay Merca door cu e ta bay cu visa di studiante e no por keda traha na Merca despues cu e termina su estudio.

“Esey nos lo tin mas ganashi na dje, aunke kizas un poco mas caro, nos ta sigur cu bo ta bin back pa yuda bo pais desaroya. Nos ta crea prijsnan economico pa studiantenan, cu condicionnan atractivo, na scolnan di nivel hopi halto unda nan por bay, paga e scol cu e lening, bin back y yuda nos desaroya. Esey ta locual Aruba tin mester dje,” Minister Croes a enfatisa.