Diaranson atardi, despues cu directiva di sindicato STA a reuni cu su miembronan na servicio di Aruba Tourism Authority Sui Generis (ATA SG), pa locual ta trata e situacion di e negociacion di e contract colectivo (CAO) nobo cu gerencia di e empresa aki, mayoria di e empleadonan a expresa nan mes pa bin cu un ultimatum.

Ta asina cu despues di casi un aña di negociacion sin cu ainda e CAO a wordo firma, directiva di STA a dicidi di manda un carta pa gerencia di ATA SG cu e ultimo proposicion presenta, caminda e sindicato ta bin cu un ultimatum pa termina e CAO prome cu dia 26 di september venidero, sino lo bin cu accion. A manda un copia di e carta aki pa minister di Turismo, Dangui Oduber y tambe pa minister di Labor, Glenbert Croes.

Minister di Turismo
Bon Dia Aruba a tuma contacto cu minister Dangui Oduber riba e situacion tenso reinando cerca e empleadonan di ATA, y e ultimatum duna pa medio di sindicato STA. E mandatario ta haya lamentabel cu a yega na e situacion aki, cu sigur den su opinion por a evita.

El a expresa cu mas cu 1 aña caba tin negociacion di CAO entre management di ATA y sindicato STA cu ta representa e trahadonan. Pues e ta haya cu gerencia di ATA ta esun cu ta encarga y esun responsabel pa yega na un acuerdo entre nan y sindicato STA. Como minister, e mes a wordo acerca pa e sindicato STA, y te hasta a tene reunion cu e trahadonan pa scucha nan preocupacionnan y purba evita di yega na e situacion actual. El a agrega cu e negociacion a tuma demasiado tempo, y e ta spera cu tin boluntad di ambos partido pa yega na un acuerdo.

“Turismo ta demasiado importante pa tin incertidumbre na e momentonan aki di esunnan cu ta labora na ATA,” textualmente e mandatario a expresa. Igualmente el a laga sa cu mester balora tur trahado, pasobra na final di dia, nan ta parti importante di tur e trabounan cu ta haci den turismo. “Ta iresponsabel pa e situacion keda manera cu e ta,” segun e mandatario.

Comunicado di STA
Pa medio di un comunicado, STA a informa entre otro cu for di november 2018 nan ta bin reuniendo cu gerencia di ATA pa purba di yega na un CAO bon balansa, cu ta inclui aumento di salario y otro beneficionan.

Sinembargo e sindicato ta haya cu gerencia di ATA ta argumenta cu no tin placa pa loke STA a trece den su proposicion of concepto di CAO. Den e caso aki –segun STA- tur culpa a wordo tira riba gobierno cu a prohibi pa duna aumento na e empleadonan, entre otro beneficionan.

Te hasta pa busca un alternativa a involucra Mediador di Gobierno, kende a brinda su intermediacion y a trece un ‘tussenvoorstel’ riba mesa cu –segun STA– tambe gerencia di ATA a ‘bari for di mesa.’ Igualmente STA a yega solicita un reunion cu minister di Turismo, Dangui Oduber hunto cu empleadonan caminda nan a expresa nan malcontento cerca e mandatario y te hasta nan a expresa nan deseo pa mira un cambio den gerencia di ATA SG.

Pa STA, ta tristo pa mira un compania cu ta genera ‘asina hopi placa’ ta trata su empleadonan cu ta traha cu alma y cuerpo pa pusha nos turismo. P’esey STA no ta vacila pa cualifica e actitud di gerencia di ATA como uno ‘terco,’ cu te awe ta ser hiba na mesa di negociacion. Esaki a pesar cu Mediador di Gobierno a haci tur intento pa e partidonan yega na otro.