Minister di Salubridad Publico, Dangui Oduber a informa comunidad cu e strategia cu nan ta hibando ta uno hopi agresivo di test pa contraresta cu e coronavirus/Covid-19 lo por sigui plama den comunidad.

“Nos kier haci hopi test posibel,” el a bisa. A pesar cu e update di casonan positivo ta mustra cu ta den e margennan, y esaki por trece un tiki di trankilidad. Te ayera tardi nos tabatin 60 caso positivo, pues esaki no ta nifica cu nos mester baha warda den e lucha pa evita e virus masha contagioso aki. “Na e momento aki nos por bisa cu nos tin e situacion bao control,” el a contesta na Bon Dia Aruba.

Strategia y analisis.
Oduber a bisa cu nan tin un strategia, pero tambe a base di analisis nan ta uzando diferente modelo. Nan ta wordo instrui dor di RIVM di Hulanda cu ta brinda ayudo riba conseho y proteccion cu ta wordo haci riba e desaroyo di e virus den nos comunidad.

E mandatario a bisa cu te aworaki e ‘rate’ di transmision – cu ta e factor cu ta determina con e virus ta wordo plama den comunidad – ‘ta den e margennan.’ E cantidad di personanan cu ta test positivo den comparacion cu e testnan cu ta wordo haci tambe ta den e margen. Igualmente e personanan interna actualmente den hospital. Den esaki nan ta siguiendo e patronchi di Organisacion Mundial di Salud (WHO).

E mandatario a splica cu na momento cu nan por haci mas test, nos autoridadnan di salubridad publico por identifica e casonan positivo mas tempran. Asina nan por isola tur e personanan cu ta resulta positivo. El a agrega cu hopi bes un hende por ta positivo ‘pero e mes no sa.’ P’esey ta importante e test, pa evita cu e persona aki no sigui move den comunidad y evita e risico cu e por contagia y plama e virus di un forma incontrolabel.

Control.
Otro strategia hunto cu esun di test mas agresivo y isolacion e hendenan cu ta positivo, nan a bin cu esun di controla esunnan cu ta den cuarentena. Ya caba for di siman pasa gobierno a institui un task force pa controla e personanan cu ta den cuarentena, no solamente via telefon of celular, sino fisico tambe. Nan a amplia e task force aki y tambe a introduci un app pa monitor tur esunnan cu ta den cuarentena.

Durante nan prome control un persona den cuarentena a haya un multa, pasobra e no a wordo localisa na su adres. Ademas di e multa, gobierno ta considerando un medida mas pisa. “Si esaki di berdad no ta duna e resultado desea, e ora nan ta bay haya no solamente un instruccion, sino cu e ta bira un forma obligatorio, pa medio di un decreto ministerial,” el a declara.

Tur hende mester ta consciente cu e virus aki ta hopi serio y ya caba tin un persona di 46 aña interna den ICU. Oduber a expresa su preocupacion pa cu e comportacion di algun persona cu ta den cuarentena, ya cu e comunidad tin e confiansa cu nan a asumi e responsabilidad civico di sigui e instruccion pa keda paden.

El a aclaria cu no necesariamente esun cu ta den cuarentena ta positivo pa Covid-19. Pero pa precaucion nan ta wordo poni den cuarentena debi cu e persona aki sea tabatin contacto cu un persona cu tabata positivo; of el a bin for di e paisnan unda tin e virus aki.