Un serie di caso di atraco y hortamento a keda registra durante e delaster dianan. E necesidad di mas personal den Cuerpo di Polis (KPA) pa garantisa y fortalece mas e tereno di siguridad den nos comunidad ta keda un reto, ya cu cierto departamentonan mester di mas personal, pero door di presupuesto no por cumpli cu esaki tur ora.
Sinembargo, Minister di Husticia, Andin Bikker a informa Parlamento – durante tratamento di presupuesto complementario – cu su ministerio ta haciendo nan maximo esfuerso. A pesar di e retonan aki, Bikker a bisa cu e meta cu e gabinete aki a pone su dilanti ta esun di restaura e trankilidad y paz den ordo publico. Pero tambe pa baha e indice di criminalidad.
Indice di Atraco.
El a trece como ehempel cu e indice di atraco na 2006 tabata 65 den un aña. Pero na 2018 nan a logra reduci na 34, y e aña aki faltando apenas algun dianan pa 2019 cera –segun e mandatario– tambe nan tin’e bou control.
“Compara cu 2006 cu tabatin 65, aworaki exactamente nos tin’e hobi bou control”, e mandatario a declara. Esaki no obstante e retonan cu nos ta bin hayando for di e pais bisiña Venezuela, cu tin su efecto pa cu nos comunidad. A pesar di e reto aki, segun e mandatario, e gobierno aki por a logra su compromiso pa restaura trankilidad di nos pueblo y nos bishitantenan.
Considerando cu nos pais ta un isla chikito, mester hiba un maneho hopi stringente pa loke ta trata aplicacion di asilo, pero pa loke ta trata admision general di hendenan di afo. E mandatario a laga sa cu e situacion na Venezuela, con cu bay bin, di e 34 caso di atraco cu tabatin na aña 2018, nos autoridad a bin ripara cu como 13 pa 14 tabata sospechoso di comete criminalidad na Venezuela.
Igualmente el a bisa cu den nan maneho, nan kier bin cu mas post di Polis den bario. Sinembargo e mesun reto financiero den presupuesto ta pone cu bo tin cu wak con mas eficiente posibel por haci uzo di e personal disponibel trahando full-time. Y esey ta pone cierto limite riba cuanto post di Polis den bario bo por tin.
