Segun minister di Husticia, Andin Bikker: Decision pa persona di afo bandona Aruba ta depende di caso specifico

Cantidad di trahadonan di afo, cu nan estadia na Aruba ta depende di un permiso di trabao, ta preocupa cu nan situacion legal. Nan a keda desemplea debi na cantidad di puesto di trabao perdi den cuadro di e crisis actual.

Nan ta den un incertidumbre grandi, ya cu nan tin añanan bibando na Aruba. Te hasta nan tin yiunan cu a nace na Aruba y cu nan ta bayendo scol akinan. Pero nan a keda sin trabao y dificilmente nan lo por tin un permiso di trabao cu por garantisa nan estadia legal na Aruba.

Minister di Husticia, Andin Bikker, bou ken ministerio DIMAS ta resorta, a referi na e maneho pa atende casonan asina. E mandatario a bisa cu den un situacion asina, dificilmente nan por generalisa. Pasobra cada caso ta diferente den cuadro di ley di admision y expulsion (LTU).

“Ta depende di e caso specifico di un persona pa por duna un contesta, si e persona ey mester tene cuenta cu tin cu regresa su pais si of no,” segun e mandatario.

Tur cos ta depende di ki fase bo cantidad di permiso ta. Si ta un persona cu por ehempel ya caba ta bayendo di permiso nuebe pa dies ta otro situacion. Tratado internacional ta bisa cu unabes bo biba den un margen di 10 aña den un pais cu a bira bo propio hogar, nan ta protegi pa tratado internacional. Pasobra den un caso asina ta dificil pa bisa un persona pa bay busca nan porvenir den nan propio pais, despues di 10 aña cu el a biba den otro pais.

E siman aki e tabatin plania un reunion cu minister di Labor y Asunto Social, Glenbert Croes pa nan por determina parti di e maneho aki. Pero tambe cuanto di e permisonan aki lo wordo aproba. Un factor tin di haci cu e tempo cu e persona ta estableci na Aruba. El a bisa cu si ta trata di persona cu ta bayendo di permiso un pa permiso dos, tin articulo 7 di LTU cu ta dicta cu mester haci prome un screening di e mercado laboral tur aña. Si ta bin resulta cu no tin mas cupo di trabao pa bo, esaki kiermen cu bo mester cuminsa prepara pa regresa bek na bo pais.

Dos siman pasa nan a ricibi un conseho specifico pa instancianan manera DIMAS y di departamento di Asunto di Calamidad pa loke ta trata Covid. E tin di haci con Aruba lo tin cu atende cu asunto di permiso pa loke ta trata persona cu a bin di afo pa busca un miho porvenir. Pero dor di Covid e mercado laboral a cambia completamente.