Recientemente, famia di Zinnia Croes a cuestiona publicamente e hecho cu minister di Husticia, Andin Bikker a haci peticion na minister di Hulanda pa aclaracion y informacion tocante e caso Mitch Henriquez, siendo cu no a duna debido atencion na e caso di Zinnia Croes.
Segun un relato di e noticiero online, noticiacla.com, Bikker a reacciona pidiendo disculpa na e famia, no pa e diferencia di trato pa cada caso, sino pasobra e no lo a informa e famia riba desaroyonan recien di e caso di Zinnia Croes.
Manera por recorda, tabata casi cinco aña pasa cu Zinnia Croes (di 12 aña di edad) a fayece na momento cu e agente di polis, Jadira Vriend a dal’e cu auto. E caso aki a bira controversial, ya cu tata di e victima, Gilbert Croes a culpa cuerpo policial pa e mal investigacion haci. E erornan cometi ta entre otro e prueba pa mustra cu e polis a bebe ora e tabata tras di stuur riba e dia fatal ey. Na aña 2017, Hues a declara Vriend culpabel di core mata e hoben Zinnia Croes (12). Aunke hues no ta haya prueba cu e tabata bou influencia di alcohol, el a sigui e exigencia di Ministerio Publico pa su castigo: 240 ora di castigo alternativa (taakstraf)y un curso obligatorio pa core bou influencia y dos aña prohibi di core auto (keda sin rijbewijs).
Awo, Bikker a bisa cu maske el a faya di comunica cu famia Croes, e no a laga e caso sin atencion, segun noticiacla.com. “Mi ta pidi e persona concerni mi dispensa pa esaki”, segun e mandatario.
Alabes el a bisa cu e caso Croes y e caso Henriquez ta diferente y no por compara nan. E ta aclaria cu e caso di Henriquez, Bikker ta cuestiona con Hulanda ta tratando e caso en cuestion, mientras cu den caso di Croes na Aruba, ta den proceso di apelacion unda gobierno mes kier logra un castigo mas grandi contra e agente policial en cuestion.
Sinembargo, segun e relato hues ya caba a determina cu Vriend no por ricibi dos biaha castigo pa e mesun crimen, indicando asina cu no lo por cumpli cu e deseo di Bikker den e caso Croes.
