Na mei 2023 Departamento di Impuesto DIMP a informa comunidad cu e atraso den procesamento di cobransa di inkomstenbelasting y primanan social manera AOV/AWW y AZV a pasa pa historia. Cu trabao duro y dedicacion grandi a logra elimina e retraso aki cu a existi pa 40 aña na nos Pais.

DIMP a sigui di biaha cu e trabaonan pa procesa e declaracion di inkomstenbelasting 2022 den nan sistema y awor por raporta cu den e prome mita di aña 2023 ya caba DIMP a paga un total di 15.4 miyon florin na restitucion na 8,286 persona cu mester haya placa back di aña 2019, 2020 y 2021.

A cuminsa paga restitucion di aña 2022

E avance grandi aki a trece cune cu tur persona cu ya caba a yena nan inkomstenbelasting di aña 2022 y cu no tin otro debe di belasting habri, ya caba ta hayando nan cobransa definitivo y por spera nan restitucion den e lunanan nos dilanti. Cu otro palabra, DIMP ya caba a cuminsa paga restitucion di inkomstenbelasting di aña 2022.

Critica baho di parlamentario di MAS

Pa largo tempo DIMP a ricibi hopi critica pa e atraso aki, pero a sa di sigui cu nan trabao na un manera profesional pa por logra e metanan stipula. Recientemente hasta Parlamentario Marisol Tromp di MAS a haya ta bon pa a lansa un critica masha baho den direccion di DIMP bisando cu ‘ta primi bala di tur hende pa entrega cos na tempo, anto di bo mes ta añanan atrasa y no ta duna Pueblo su placa back.’ Minister Maduro den un comunicado di prensa ta lamenta cu Parlamentario Tromp pa falta di conocemento, interes of simplemente wega di politikeria, ta scoge pa bagatelisa e esfuerso grandi cu e team dedica di DIMP a haci cu ta dunando su fruto na bienestar di Aruba. Ta di spera cu ora Parlamentario Tromp yena su aangifte di aña 2022 y haya su restitucion cu prioridad como Parlamentario di Pais Aruba, cu elo sa di aprecia y elogia e trabao haci pa e profesionalnan di DIMP.

Minister Maduro ta gradici henter e team di DIMP bao liderazgo di Directora Luenne Gomez-Pieters y specialmente esnan cu a traha di cerca pa resolve e atraso grandi aki, pa e trabao grandi haci na bienestar di Aruba. DIMP tin mas reto su dilanti, pero como mandatario nos ta convenci cu hunto nos lo sa di surpasa e retonan ey tambe. Masha danki pa kere den Aruba!