Minister di Finanzas, Xiomara Maduro, a traves di un comunicado di prensa a indica cu ta un satisfaccion grandi pa por informa cu Aruba ta logra subi mercado internacional di capital na un manera exitoso.
Despues di un ausencia di 3 aña debi na e daño financiero causa pa e pandemia, Aruba ta logra refinancia debenan bieu cu ta madura den aña 2024 na un bon interes. Ta trata di un transaccion financiero di 134.5 miyon dollar na un interes di 6.3%. Segun e comunicado di prensa, awe dialuna Minister Maduro lo splica mas di e transaccion exitoso aki pa Aruba den un conferencia di prensa.
Minister di Finanzas ta gradici e banconan Santander y Citi cu a yuda e mandatario den henter e proceso aki di bay back riba mercado internacional di capital na un manera exitoso. Na e ekipo di profesional di Aruba cu a sa di presenta e storia di recuperacion financiero y economico di Aruba na un manera eficaz, e mandatario ta manda un danki di curason pa nan esfuerso y amor demostra pa nos Pais. Mas cu claro Minister Maduro ta gradici nos bon Dios pa su guia, sabiduria y pasenshi pa yud’e lidera y logra trabounan grandi na bienestar di Aruba.
Minister Maduro ta gradici specialmente e inversionistanan existente y esnan nobo expresando, “Thank you to all investors for your trust and believe in Aruba. We look forward to a good relationship where Aruba may be in your thoughts and in your hearts.” Masha danki!
