Dialuna mainta minister di Finanzas y Cultura, Xiomara Maduro, a tene un conferencia di prensa durante cual el a duna un actualisacion ariba e situacion financiero di pais Aruba, durante e conferencia a contesta pregunta tocante ki efecto esaki por tin riba belasting pa ciudadanonan di Aruba, si ta trahando riba un fondo di preparacion y si tin posibilidad pa brinda mas alivio.
E mandatario a splica, contestando pregunta tocante kico e situacion financiero ta nifica den e aspecto di belasting pa e ciudadanonan, cu debi na e maneho financiero, na e hecho cu tin surplus, cu gobierno ta traha cu presupuestonan multianual y cu notanan di comienso di aña, nan tin un bon bista riba con pais Aruba ta para financieramente.
E bista aki, el a sigui splica, ta yuda gobierno y pueblo sa cu gobierno no ta bin di un dia pa otro cu belasting extra y alabes ta duna oportunidad pa duna mas alivio.
El indica cu nan a cuminsa duna alivio a caba. El a splica cu nan a cuminsa un tempo caba cu baha loonbelasting, y banda di esey nan a cuminsa brinda alivio manera entre otro reparatietoeslag y aumento den e bijstand pa personanan cu limitacion, cu ta alivionan cu ta bay directamente na e ciudadano.
E mandatario a resalta cu tin necesidadnan cu gobierno ta consciente di nan, pero prome cu por cubri e necesidadnan aki, el a indica, mester tin bon bista financiero pa gobierno por habri espacio pa brinda back na esnan cu mas tin mester dje.
A puntra e minister si tin posibilidad cu belasting por baha cierto caminda pa e ciudadano Arubiano, na cual el a contesta cu si ta un posibilidad.
El a splica cu primeramente mester a sali di e situacion financiero precario y mester a traha pa stop e crecemento di e debe pa por a haci cierto refinanciamento. Ademas tambe mester a traha pa cambia e parti di cierto debenan local pa refinancia nan localmente pa baha e presion di interes.
Pero na momento cu pandemia a yega, esaki a haci cu mester a haci prestamo cu Hulanda, pero a pesar di esaki, e minister Maduro ta indica, nan no a aumenta e debe na un manera exagera, a contene esaki pa ora pandemia a caba por a cuminsa traha pa recuperacion y a haci cierto cambionan pa mitiga e situacion financiero.
“E cambionan ey ta traduci nan mes den espacio financiero cu por wordo usa pa paga debe y baha e presion y pa distribui e fondonan ey pa brinda alivio na unda cu tin mester. Mas dilanti tin e situacion cu ta sigui haci reforma caminda cu por baha e presion di belasting directo, pueblo ta keda cu mas placa den su man y tambe brinda e alivio cu ta yega di biaha na e pueblo,” e mandatario a remarca.
Prome minister a indica anteriormente cu basa riba e surplus ta bay tin un desaroyo basta amplio riba e isla di Aruba proximamente. Relaciona na esaki miembro di prensa a puntra minister Maduro si no tabata miho pa pone e surplus un banda den caso cu algo bolbe sucede cu lo por conduci na otro prestamo sea di Hulanda of internacionalmente.
E mandatario a splica cu gobierno ta pensa riba e aspecto ey tambe, pero na mesun momento el a aclaria cu loke prome minister a indica ta cu tin fondonan ta bin liber pa por haci inversionnan den por ehempel infrastructura, cu ta inversionnan cu mester a warda na momento cu gobierno mester a contene su gastonan y no por a haci e inversionnan ey.
“Ta inversionnan cu aworaki tin espacio financiero pa nan y ta wordo haci tambe. Pa gobierno ta hopi importante cu bo por tin espacio financiero cu e surplus ta trece cune pasobra si bo no baha e debe aki, claramente esaki ta keda pisa riba bo cartera y no por haci nada,” el a resalta.
Minister Maduro a remarca cu gobierno a bin ta traha tambe riba un paraatsheidsfonds (fondo di preparacion) den cual ta hinca fondonan pa si yega un momento cu algo pasa, tin e fondonan ey disponibel pa por yuda den e situacion ey. “E ta algo cu gobierno ta pensa riba, ta algo cu ta traha riba dje,” el a agrega.
Kedando den e topico di impuesto, e mandatario a ricibi e pregunta si por tin posibilidad di exonera pensionadonan cu ainda por traha di paga impuesto. El a splica cu tur persona cu ta traha, sin importa ken e persona ta of si e ta pensionado, tin cu paga belasting riba su entrada.
Esaki ta algo cu por cay duro pa e pensionadonan, pero el a resalta cu esakinan ta punto cu gobierno por hiba den un reforma na momento cu Aruba ta suficientemente stabiel financieramente pa por carga e cambionan aki.
El a menciona cu cada aña tin mas hende ta bay den e fondonan di pensioen y esey ta indica cu cada cambio cu wordo realisa na e momentonan aki, mester sigura fondo, no solamente pa e aña aki pero tambe structuralmente pa e añanan cu ta bin pa bo por cumpli cu tipo di reforma asina.
El a sigui splica cu di parti di belasting, na momento cu tin un miho bista riba e entrada di pais Aruba, esey ta trece cune cu por tin miho cumplimento locual na su turno ta trece cu tin un miho bista y tambe entrada. Y na e momentonan ey, el a indica, por traha riba alivionan cu ta inclui entre otro alivio cu por toca e pensionadonan pa loke ta trata e parti di belasting.
El a señala cu ya caba a introduci cierto cambionan fiscal cu a brinda alivio na e pensionadonan, manera por ehempel a aumenta e belastingvrij voet y esey ta pone cu hopi pensionado ta cay bou di esaki y nan no lo mester paga belasting pa nan entrada.
Ademas, el a indica, a pone tambe pa esnan di AOV cu nan por haya bienes separa for di 2023 y esaki ta yuda cu e presion cu ta paga ariba belasting pa e pensionado ta bira menos. Banda di esaki AZV, cual el a subraya ta un di e dolornan grandi di pensionadonan, tambe a cambia pa loke ta e suma y ta indica cu eynan tambe a duna un rebaho.
