Segun minister di Finanzas, ta bay evalua Protocol entre Aruba y Hulanda den contexto di finanzas publico sostenible

Ayera, a traves di un comunicado di prensa, minister di Finanzas, Xiomara Maduro a informa cu a reuni cu representantenan di Economisch Bureau Amsterdam, kendenan ta haci un investigacion pa Ministerio di Relacion Interior y di Reino (BZK) riba e maneho cu ta wordo hiba pa BZK pa asina por yuda e Paisnan Aruba, Corsou y Sint Maarten yega na un finansa publico sostenibel.

Segun Maduro a informa, na Aruba, BZK a haci uzo di e ‘tool’ di Protocol den cual ta pone normanan financiero pa asina por cumpli cu e meta pa Aruba por yega na un finanzas publico sostenibel.

E intencion di e reunion tabata pa haya sa con den practica e Protocolnan entre Aruba y Hulanda a wordo implementa y kico e resultado tabata. Tin varios Protocol cu a wordo firma entre Aruba y Hulanda. Asina ta haya na aña 2013 e Witte Donderdag Akkoord y tambe e Protocol di aña 2015 cu normanan financiero cu despues a wordo adapta y prolonga na aña 2018 y e mesun Protocol aki a keda prolonga un biaha mas na december 2021, memey di e pandemia. Den e Protocol tin norma financiero pa e surplus, gasto di personal y nivel di debe. Tur cos ta mustra cu Aruba a cumpli cu e normanan financiero, segun Maduro. Banda di e ‘tool’ di Protocol, lo investiga tambe con hopi Hulanda a yuda cu, por ehempel, asistencia tecnico y cu fiansa na interes reduci, pa asina Aruba por yega na cumpli cu e meta proponi pa logra un finansa publico sostenibel.

Ta importante pa evalua e manera cu ta traha den Reino Hulandes y sigur pa Aruba ta necesario pa mira kico e resultado tabata di e Protocolnan firma cu Hulanda. Ta bon pa sa cu e supervision financiero di Aruba no ta cay bao di e ‘scope’ di e investigacion aki. Esaki ta debi cu e supervicion financiero di Aruba, contrario na esun di e otro Paisnan den Reino Hulandes, ta regla den e LAFT cu ta un Ley di Aruba. E LAFT no ta un ‘tool’di BZK manera e RFT, cu ta e Ley di Reino cu ta regla supervision financiero na Corsou y Sint Maarten, segun e comunicado ta enfatisa.

Finalisando, minister di Finanzas a indica cu lo keda pendiente pa e resultado di e evaluacion aki di e Protocolnan cu ta atende cu e supervision financiero di Aruba. “Ta bon pa nos tur por sa si BZK a haci bon uzo di e ‘toolsnan’ na su desposicion y si e ‘toolsnan’ aki berdaderamente a cumpli cu e meta pa cual nan a wordo uza, esta mehora e finanzas publico di Aruba.”